"Башҡорт китабы топ-100+" китабы акцияһына башҡортса әҫәр йә китап тураһында иң ҡыҙыҡлы баһалама яҙған гәзит уҡыусыларыбыҙҙы билдәләп үтер ваҡыт етте.

Үҙе уҡыған, күңеленә ятҡан әҙәбиәтте башҡалар ҙа ҡыҙыҡһынып ҡулына алһын өсөн бик тырышып яҙылған хаттар һирәк килһә лә, берәгәй булды. Шулай уҡ "Киске Өфө" гәзитенең "Бәйләнештә" социаль селтәрендәге төркөмөндә фекерҙәрен белдереп торҙо дуҫтарыбыҙ. Бөтә баһаламалар араһында Дауыт Юлтыйҙың "Ҡан" романына тулы баһалама яҙыусы Р.Ғарипов исемендәге 1-се Башҡорт республика гимназияһы уҡыусыһы Азалия Ниғмәтуллинаның хаты айырылып торҙо. Уға акцияла ҡатнашыуы өсөн "Киске Өфө" гәзитенән бүләккә Мәрйәм Бураҡаеваның "Арғымаҡ" китабы бирелә.
Шулай уҡ "Бәйләнештә" социаль селтәрендә Гөлнур Яҡупованың "Ҡатындар" романы тураһында бик йөкмәткеле яуап биреүсе Зиләрә Юлтаеваға гәзитебеҙҙән бүләккә "Ынйы бөртөктәре" башҡорт афоризмдары китабын тапшырабыҙ. "Башҡорт китабы топ-100+" акцияһына ҡушылып, һәр быуын кешеһе уҡырға тейешле әҫәрҙәрҙе һәм китаптарҙы билдәләүгә битараф ҡалмауы өсөн барлыҡ гәзит уҡыусыларға ла рәхмәтебеҙҙе белдерәбеҙ! Был акция ярҙамында беҙ башҡорт халҡының әҙәби мираҫына иғтибар йәлеп итеүҙән тыш, илһөйәрлек тәрбиәләргә ярҙам итеү маҡсатын да ҡуйғайныҡ. Сөнки туған телендә ижад ителгән әҫәрҙәрҙә халыҡ һәм Ватан тураһында яҙылғандар кеше күңеленә яҡыныраҡ та, ҡәҙерлерәк тә була. Башҡорт әҙәбиәтендә уҡырлыҡ әҫәрҙәр, күңел ҡылдарын тирбәлтер шиғри юлдар, халыҡтың тарихы һәм киләсәгенә төбәлгән фәһемле фекерҙәр бихисап. Шул турала һәр кем мәғлүмәтле булһын һәм милләттәштәр туған телендә һөйләшһен, әҙәбиәт уҡыһын, яҙышһын, ваҡытлы матбуғатты алдырһын, тигән теләктә ҡалабыҙ.
Әйткәндәй, тулы исемлекте "Киске Өфө" гәзитенең "Бәйләнештә" селтәрендәге махсус төркөмөндә ҡарау мөмкинлеге буласаҡ. Акция тамамланһа ла, һәр быуын кешеһе өсөн уҡымлы булыр әҫәр йә тотош китап күҙ уңынан төшөп ҡалыуын шәйләһәгеҙ, тәҡдимдәр индереүҙе дауам итә алаһығыҙ.

Рубриканы Сәриә ҒАРИПОВА

КИРЕ СЫҒЫРҒА