Башҡорт дәүләт ҡурсаҡ театры артисы Дилә Муллабаева Силәбелә булып үткән Клавдия Шульженко исемендәге Бөтөн Рәсәй актер йыры конкурсының "Театрлаштырылған йыр" номинацияһында юғары наградаға - 1-се урынға лайыҡ булды.

Быйыл 19 майҙа Наум Орлов исемендәге Силәбе дәүләт академия драма театрында Клавдия Шульженко исемендәге 12-се Бөтөн Рәсәй актер йыры конкурсы үткәрелде. Билдәле артистар һәм талантлы йәштәр 12-се тапҡыр инде йырҙы ҡыҫҡа, ләкин иҫтә ҡалырлыҡ драматик спектаклгә әйләндереү буйынса һәләттәрен һынап ҡараны. Был конкурста беренсе тапҡыр Өфө артисы ла ҡатнашты. Дөрөҫөрәге, Башҡорт дәүләт ҡурсаҡ театрынан. Дилә Муллабаева - З.Исмәғилев исемендәге Өфө дәүләт сәнғәт институтын тамамлаған. Студент сағында уҡ әле ул үҙен көслө темпераментҡа һәм ҙур ижади мөмкинлеккә эйә артист итеп күрһәтте. Ә уның нисек йырлағанын ишетһәгеҙ! Был уның быйылғы йыр конкурсында икенсе еңеүе - март айында ул Өфөлә булып үткән "Яҙ актрисаһы" актер йыры конкурсында 1-се урын алғайны инде. Ә Гран-прины унда БР Милли йәштәр театрынан Алтынай Хамматова яуланы.
Ҡурсаҡ театрында Дилә өмөтлө артистарҙан иҫәпләнә. Һығылмалығы, музыканы тәрән тойоуы менән айырылып тора; ҡурсаҡтар менән оҫта эш итә, "тере" планда ла тәбиғи ҡабул ителә. Уның яңы эштәренән - "Муза-Цокотуха"лағы - Ҡыҙыҡай, "Мең дә бер кис"тәге - Әсирә, "Мөғжизәле ете теләк" спектаклендә Йәмилә ролдәрен айырып билдәләү кәрәк. Ә "Һинд легендаһы" спектаклендә ул яңғыҙ бейеү партияларын башҡарыуы менән таң ҡалдырғайны.

КИРЕ СЫҒЫРҒА