Германияның билдәле туристик үҙәктәренең береһендә - Гейдельберг ҡалаһында Башҡортостан оҫталарының күргәҙмәһе асылды. Ул "Башҡортостандың халыҡ туҡымалары" тип атала. Макс Бергтың текстиль музейында был күргәҙмә 3 ай барасаҡ.

Сараны асыу тантанаһында Майндағы Франкфурт ҡалаһындағы Рәсәй Федерацияһы Генераль консуллығы вице-консулы Динар Әхмәтғәлиев сәләмләне. Башҡортостандың рәсми делегацияһы ла ҡатнашты. БР мәҙәниәт министры Әминә Шафиҡованың сәләм хатын Республика халыҡ ижады үҙәге генераль директоры Артур Әлибәков уҡып ишеттерҙе. "Бөгөнгө сара - хеҙмәткә, сәнғәткә, ижадҡа уртаҡ ҡарашлы, әммә икеһе ике төрлө булған мәҙәниәттәр араһына күпер һуҙа. Башҡортостан Республикаһы VI Бөтөн донъя фольклориадаһына әҙерләнә һәм башҡа мәҙәниәттәр менән ҡыҙыҡһыныу беҙҙең өсөн айырыуса мөһим", - тиелә унда. Артур Айҙар улы был күргәҙмәне ойоштороуҙа ярҙам күрһәткәндәре өсөн Купфальц музейы директоры доктор Фредер Хепп, Макс Бергтың текстиль музейы директоры доктор Кристин Шерер, яҡташыбыҙ Динара Даниэлға рәхмәт белдерҙе.
"Башҡортостандың халыҡ туҡымалары" проекты республика Башлығы грантына үткәрелә. Башҡорт халҡының бай мәҙәниәтен сағылдыра был күргәҙмә. "Надежда" ҡорама халыҡ клубы, Балаҡатай районының "Тамбур" халыҡ клубы, шулай уҡ профессиональ һәм үҙешмәкәр биҙәү-ғәмәли сәнғәте оҫталары эштәре, Республика халыҡ ижады үҙәге төрлө йылдарҙа ойошторған "Урал" халыҡ сәнғәте галереяһы проекттары тамашасы иғтибарына тәҡдим ителә. Күргәҙмәне ҡарау 20 майға тиклем дауам итәсәк. Ошо өс ай эсендә башҡорт сәнғәте өлгөләре менән донъяның төрлө илдәренән килгән меңәрләгән кеше таныша аласаҡ. Ойоштороусылары - БР Мәҙәниәт министрлығы, Республика халыҡ ижады үҙәге, "Урал" Халыҡ сәнғәте галереяһы.

КИРЕ СЫҒЫРҒА