Күптән түгел Октябрьский ҡалаһында Ғата Сөләймәнов исемендәге Ҡурай байрамы еңеүсеһе билдәләнде. Республиканың 10 ҡалаһы һәм 19 районынан, шулай уҡ Силәбе һәм Ҡурған өлкәләренән килгән 324 бәйгесе араһынан Шамил КҮСӘМИШЕВ иң оҫтаһы тип танылды. Ошо уңайҙан Шамил Шакир улы менән әңгәмәләшеп алдыҡ.

Ҡурайсылар араһында иң абруйлыһы иҫәпләнгән бәйгелә еңеүгә юлығыҙ оҙон булдымы?

- 7-се класта ҡурай уйнарға өйрәнеп, унан һуң Сибай сәнғәт колледжын, БДУ-ның Сибай институтын, З. Исмәғилев исемендәге Өфө дәүләт сәнғәт институтында магистратура тамамланым, быйыл диплом аласаҡмын. Йәғни беренсе тапҡыр ҡулыма ҡурай алып, ошо музыка ҡоралын ғүмерлек юлдашым итеп һайлағандан алып, тиер инем. Музыкант та бит, спортсы кеүек үк, көн һайын физик әҙерлеген нығытырға тейеш, шунһыҙ формаңды тиҙ юғалтасаҡһың. Оҫталыҡтың нигеҙендә хеҙмәт ята. Унан һуң, ҡурайсылар араһында үткәрелгән һәр бәйге ҙур яуаплылыҡ талап итә. Унда еңел-елпе генә әҙерлек менән барып тормаһаң да була. Сөнки бәйгенең талаптары ҡаты - 100 башҡорт халыҡ көйөн, уның тарихын, легендаһын белергә тейешһең. Билет буйынса миңә "Юлғотло", "Тәфтиләү" эләкте, баһалама ағзалары, берәй марш уйнап күрһәт, тигәс, "Дим буйы бүртә" көйөн башҡарҙым. Халыҡсан итеп, борондан халыҡ араһында һаҡланып килгәнсә уйнау ҙа талап ителә.

Бәйгенең ҡурайҙы пропагандалау менән бергә һәләтле башҡарыусыларҙы асыҡлау тигән маҡсаты ла бар. Үҙегеҙ ҙә уҡытыусы булараҡ, ҡурай сәнғәтенең бөгөнгө торошо менән ҡәнәғәтһегеҙме?

- Был бәйге еңеүселәрҙе үҙе үҫтереп ала, тиергә кәрәк. Ҡатнашып, башҡаларға ҡарап ҡайтыу ҙа ҙур тәжрибә. Өйрәнәһең, сәм уяна. Баһалаусылар составы ла абруйлы һәм талапсан ҡурайсыларҙан, белгестәрҙән тора, быныһы ла үҫтерә. Мин дә 2-3 тапҡыр килеп, быйыл ғына Гран-при алыуға өлгәштем. Быйыл да еңеүсе тигән исемгә лайыҡлы егеттәр күп ине, араларында бик көслөләре бар. Уларҙың барыһы ла алда әле.
Үҙем башлап һөнәри белем алған Сибай сәнғәт колледжында 2007 йылдан бирле уҡытыусы булып эшләйем һәм ошо арауыҡта ҡурай класына кеше йыя алмай ултырған ваҡыттар булманы. Беҙҙең яҡта, Сибай ҡалаһында, ҡурайсыларға иғтибар ҙур, был да үҙ өлөшөн индерәлер. Улай тиһәң, һуңғы йылдарҙа республиканың бөтөн төбәктәрендә лә ҡурайҙа уйнау әүҙемләште. Быйыл бәйгелә сит төбәктәрҙән дә ҡатнашыусылар булды. Еңеүемә үҙемдең уҡытыусыларым Мөхәррәм Кәримов, Әхиәт Ғәйетбаев, Йәмил Үтәбаев, Нурғәли Ҡайыҡбирҙиндарҙың да көсө һәм ышанысы һалынғанлыҡтан, киләсәктә үҙемдең уҡыусыларымдан да ошондай шатлыҡлы хәбәрҙәр ишетермен, тип өмөтләнәм. Ҡурайға бит ул бер ғашиҡ булһаң, был һөйөү ғүмерлеккә әйләнә. Мине бар яҡлап аңлаған ғаиләмә - ҡатыныма һәм балаларыма ла рәхмәтлемен.

Ләйсән ДАЯНОВА әңгәмәләште.

КИРЕ СЫҒЫРҒА