Өфө мәктәптәренең береһе бөтә республика ата-әсәләр йәмәғәтселеген аяҡҡа баҫтырҙы. Баҡтиһәң, уҡыусыларға бешер-бешмәҫ тефтели ашатып ағыулай яҙғандар. Сәғәт ярым бешереп тә, тейешле төҫ алмаған итте кемдәр, нимәнән, нисек етештереүе тикшерелгән.

Өфө мәктәптәре ашханаларын аҙыҡ-түлек менән тәьмин итеүсе Марина Әсфәндийәрова етәкселегендәге берҙәм оператор “Центр диетического и детского питания” муниципаль автоном учреждениеһы Ҡариҙел районының “Зуевское” яуаплылығы сикләнгән йәмғиәте етештергән сырьены ҡуллана. Инциденттан һуң ялыуҙар күп килгәс, баш ҡаланың 71-се мәктәбендә бер тәүлек һаҡлана торған тефтели үрнәге тикшереүгә ебәрелгән. “Зуевское” диреторы Альберт Мөхәмәтйәнов был осраҡты үҙенә генә түгел, бөтә республика етештереүселәренә ҡаршы эшләнгән махсус пиар-акция, тип иҫәпләй.
- Индия, Уругвай, Парагвай илдәренән осһоҙлата буйвол һәм тауыҡ итенең тиреһенән эшләнгән сосиска ашаталар ҡайһы урындарҙа. Туҡланыуҙы баһалаған тикшереүҙәр һөҙөмтәһендә 500-ҙән артыҡ буйвол итенән етештерелгән сосиска менән туҡландырыу осрағы теркәлгән. Ә беҙҙең ит продукцияһы башынан аҙағына тиклем бөтә талаптарға яуап биргән шарттарҙа етештерелә, - тип белдерҙе Альберт Мөхәмәтйәнов. Ә Өфөнөң 71-се мәктәбе ашханаһындағы сей тефтели тикшереүселәр тарафынан “бала сәләмәтлегенә зыян килтермәй”, тип табылған.

Сәриә ҒАРИПОВА.