Йәмғиәттә ыңғай ҡараш, ыңғай тойғолар киреләренән күберәк булғанда йәшәүе шул тиклем күңелле. Шөкөр, ошоно тойоп, күреп, ҡыуанып йөрөйөм һуңғы ярты йылда. Ҡала урамдарында асыулы йөҙҙәр ҙә һирәгәйә төштө, кешеләр йылмая башланы кеүек миңә.

Былар барыһы ла уларҙың йәшәйешебеҙ, көнкүрешебеҙ менән ҡәнәғәт үк булмаһалар ҙа, киләсәккә өмөттәре барлығына ишара яһай. Кеше бит ул гел ғәҙеллек көҫәй, яҡшылыҡтың яуызлыҡты еңеүенә ышанып йәшәй. Барыһы ла үҙеңдең ҡулыңда, тип аҡыл һатыр ошо урында ҡайһы берәүҙәр. Әммә һинән тормаған нәмәләр ҙә бар шул. Әйтәйек, ябай ғына бер миҫал. Нисәмә йылдар ыҙа сиктергән йәмәғәт транспортында берәй ҡасан тәртип булыр, тигәнгә ышанмай инем. Бөгөн эшкә ПАЗ автобусына ултырып килдем, уның шәхси ҡулдарҙа икәне күренеп тора. Әммә дәүләт автобусындағы кеүек туҡталыштарҙы иғлан итәләр, ҡулаҡса менән бер рәттән, түләү өсөн юл картаһы ҡабул ителә, уның менән билет хаҡы 5 һумға осһоҙораҡ та. Бына ошо тәртипте, нисек кенә теләһәм дә, зарланһам да, мин булдыра алмайым. Ул өҫтән ҡушыу буйынса эшләнә.
Килде бит заман, төрлө кимәлдәге етәкселәр ябай халыҡты күрә башланы түгелме? Йылылыҡ миҙгеле башланыуы ошо хаҡтағы уйҙарға этәрҙе әле. Быға тиклем көндәр һыуыҡ торһа ла, йылылыҡ бирергә ашыҡмайҙар ине. Йылылыҡ миҙгеле башланыу менән дә әле фатирҙарҙа аҙна-ун көн йылы булмай, коммуналь хужалыҡтарҙың яуабы ла әҙер: шулай тейеш, көнөндә үк йылы йорттарға барып етмәй. Быйыл халыҡ аптыраны. Иртәнге ундар тирәһендә телевизорҙан, республика етәксеһе йылы бирергә ҡушты, тип һөйләп торалар. Ҡатынға әйтһәм, көлә минән, белмәйһеңме ни, йәнәһе, берәй аҙна көтөргә кәрәк. Төшкө сәйҙе эскәндә батареялар йылы ине инде. Улай ҙа була икән дәһә! Тимәк, элек тә мөмкин булған, ябай халыҡ тураһында уйлаусы ғына булмаған. Бында шуныһына ғына эс боша: ни өсөн кемдер, үҙ эшен, үҙ бурысын яҡшы итеп башҡарһын өсөн кемделер әрләргә, иҫкәртеү яһарға, хатта ҡурҡытырға тейеш? Кире стимулға, әйтәйек, вазифаһынан ҡыуылыуға нигеҙләнгән хөкөм системаһы ғына етәкселәрҙе эшләргә дәртләндерәме икән ни? Әйтәм, Рәсәй Президенты ла күпселек осраҡта ошо ысулды ҡуллана, ана, һыу баҫыуҙан зыян күргән төбәктәргә ҡырҡ барырға, урындағы етәкселәргә ҡырҡ иҫкәртеү яһарға мәжбүр булды.
Беҙҙең быуын башҡарған эшенән ҡәнәғәтлек алыуҙы, кешеләргә файҙалы булыуҙы, халҡыңдың тормошон яҡшыртырға ынтылыуҙы төп урынға ҡуйып хеҙмәт итте. Ошо ҡараш кире ҡайтһын ине бөгөнгө йәмғиәткә. Кеше булып ҡалайыҡ, быныһы инде һәр кемдең үҙенән тора.

Ирек СӘЙЕТҒӘЛИН.
Өфө ҡалаһы.

КИРЕ СЫҒЫРҒА