"Аҡыллы төбәк" проекты тормошҡа ашырыла башлау менән, баш ҡалала яйлап ҡына барлыҡ хеҙмәттәр цифрлаштырыуҙың иң ябай варианты булған электрон системаға күсә башланы. Был - заман талабы, сөнки ваҡыт тиҙ аҡҡан осорҙа барлыҡ мәғлүмәт кешенең ҡул аҫтында, йәғни кеҫә телефонында булырға тейеш. Интернетты күптәр сүп ояһы менән сағыштырһа ла, уны йәштәрҙе патриотик рухта һәм быуындар күсәгилешлегендә тәрбиәләү маҡсатында ла файҙаланырға мөмкин.

Өфө ҡалаһының "Махсуслаштырылған хеҙмәтләндереү комбинаты" муниципаль бюджет учреждениеһы ошо маҡсаттан бер нисә йыл элек "Электрон хәтер китабы" IT-проектын тормошҡа ашыра башлағайны. Бөгөн ошо атамалағы сайт кешеләрҙең иҫтәлеген һаҡлау, ғаилә архивын һәм шәжәрәһен төҙөү төп маҡсаты булып торған электрон зыярат базаһына әүерелде. "Ерләнгән урыны" бүлеге яҡын кешегеҙ ятҡан урынды табырға ярҙам итә. "Ҡулланыусының шәхси кабинеты" булдырып һәм шуның аша инеп, мәңгелек йортонда ятыусыларҙың фотоларын, биографияһын өҫтәргә мөмкин. "Махсуслаштырылған хеҙмәтләндереү комбинаты" муниципаль бюджет учреждениеһы директоры Руслан Кинйәкәйев бөгөн сайтта 1370 шәхси кабинет булыуын һәм көнөнә уны уртаса 260 кеше (дөйөм алғанда 161500) ҡарауын билдәләй. Сайттың мобиль версияһы ла эшләй.
Ҡала зыяраттарында 1200 хәрби ҡәберлек иҫәпләнә, улар, нигеҙҙә, "Сергиев" һәм "Көньяҡ" зыяратта. Шулай уҡ "Билдәле кешеләр" бүлегендә 260 кешенең рәсеме, ерләнгән урыны, биографияһы, наградалары тураһында мәғлүмәт индерелгән. Һуғыш ветерандарының һәм ҡатнашыусыларының күпселеге исемлектә урын алған. Уны тулыландырыу буйынса "Юнармия" Бөтә Рәсәй балалар-үҫмерҙәр хәрби-патриотик ижтимағи хәрәкәтенең Өфө бүлексәһе менән хеҙмәттәшлек тураһында килешеү төҙөлгән.
Әйткәндәй, республикала, Рәсәйҙә генә түгел, хәҙер инде донъяла танылыу яулаған Башҡорт Википедияһы ла республиканың билдәле кешеләре, арҙаҡлы шәхестәре тураһындағы мәҡәләләрҙә уларҙың ерләнгән урынын күрһәтеп, "Электрон хәтер китабы" сайтына һылтанма ҡуя. Сөнки глобаль энциклопедияның башҡорт тел бүлеге - икенсел сығанаҡ һәм ул һәр ваҡыт беренсел сығанаҡтарға ғына таянып эш итә. Абруйлы сығанаҡтарҙың электрон варианттары бик аҙ булыуынан сығып ҡарағанда ла, "Махсуслаштырылған хеҙмәтләндереү комбинаты" муниципаль бюджет учреждениеһы бик файҙалы һәм кәрәкле эш башҡара, тип әйтергә нигеҙ бар.

КИРЕ СЫҒЫРҒА