Беҙ, Баймаҡ районы Иҫке Сибай ауылы ағинәйҙәре, "Киске Өфө"нән айырылғаныбыҙ юҡ. Унда баҫылған һәр мәҡәләнән үҙебеҙгә мәғлүмәт алабыҙ: йолалар өйрәнәбеҙ, башҡорт милли кейем буйынса кәңәштәр алабыҙ, тәрбиә мәктәбе һабаҡтарын үҙләштерәбеҙ, зыялылар һүҙен күңелдәргә һеңдерәбеҙ. Беҙ 2013 йылдан "Яҙгөл" вокаль ансамблендә лә шөғөлләнәбеҙ. Ансамблебеҙҙең репертуары бик бай. Халыҡ йырҙарын, мөнәжәттәр, популяр йырҙарҙы башҡарабыҙ, ауылда, районда, республикала үткән сараларҙа әүҙем ҡатнашабыҙ. Магнитогорск ҡалаһында үткәрелгән "Яҙғы һандуғас" фестивалендә 1-се дәрәжә диплом (2016); Сибай ҡалаһында үткәрелгән төбәк-ара мөнәжәт байрамында 1-се урын (2019); Баймаҡ районы Буранбай ауылында үткән "Рухиәт" башҡорт йырҙарын башҡарыусыларҙың район конкурсында 2-се урын (2019); Ейәнсура районында үткәрелгән "Мин яратам һине, тормош!" республика конкурсында ла призлы урындар яуланыҡ (2019). Икенсе яратҡан шөғөлөбөҙ, әлбиттә, башҡорт милли кейемдәре тегеү, биҙәүестәр эшләү. Был өлкәлә лә башҡалар менән уртаҡлашыр белем-тәжрибәбеҙ бар. Байбыҙ. "Киске Өфө" мәғлүмәт менән байыта, ҡул белгән шөғөлдәребеҙ, аралашыуҙар, әүҙем йәмәғәт эштәре менән булыу беҙҙе рухи яҡтан байыта.

Әлфиә ИБРАҺИМОВА

КИРЕ СЫҒЫРҒА