Матурлыҡ салонында тырнаҡ буятып ултырам. Барыһы ла яҡшы, барыһы ла һәйбәт, тик мастер ҡыҙҙың яңы ғына тәмәке тартып ингәне беленә бит. Битлек кейһә лә, ҡулынан, үҙенән тәмәке еҫе сыға. Сыҙарға тырышып ултыра торғас, ауырып киттем. Күңелем болғанды, хәлем бөттө. Ахырҙа "Мине һеҙҙең сигарет еҫе ауырыта" - тинем. "Это дамские сигареты, там и запаха нет", - ти был. Эш тамамланмаған бит инде.

Администраторҙарын саҡыртып, икенсе мастер һораным. Уныһын көтөргә тура килде, әммә теге тәмәкесе ҡыҙҙы башҡаса яҡын юлатманым Минең дә ваҡытты алды, әтнәке, салон өсөн дә һабаҡ булды. Тартҡан хәлдә лә клиент менән эш итер алдынан сафланып-бөхтәләнеп алырға тейеш тә инде ул. Быны салон етәксеһе лә ҡабул итте, минең талапты үтәнеләр.
Шуның кеүек хәлдәр булып тора. Мәҫәлән, йыш ҡына аҙыҡ-түлек магазиндары янында һатыусылар тартып тора ла, һатып алыусы килгәнде күреп, йәһәтләп инеп прилавка артына баҫа. Пекарня, емеш-еләк, туңдырма һатылған урындарҙа ла шулай. Тәмәке тартыуҙы барыбер ҙә сикләй алмайҙар. Һәм бик һирәктәр генә, моғайын, ҡулынан тәмәке еҫе лә китеп етмәгән кеше хеҙмәтләндереүенән баш тарта ала. Ә асылда һеҙҙең ундай хоҡуғығыҙ бар. Тәмәке еҫе килгән мастерҙан да, официанттан да, һатыусынан да баш тартып, икенсеһен һорай алаһығыҙ. (Мин хатта такси алғанда ла тәмәке тартмаған водителде, салонда бензин, тәмәке йәки хушбуй еҫе булмаған машинаны һорайым.) Ул саҡта эшкә алыусылар ҙа ҡул аҫтындағыларға гигиена тәртиптәрен ҡәтғиләтә төшөр, тәмәке тартыусылар ошо сиктәрҙе тоторға тырышыр ине. Тәртип хеҙмәтләндереүселәрҙән генә түгел, ҡулланыусыларҙан да тора...

Миләүшә ХӘБИЛОВА.

КИРЕ СЫҒЫРҒА