Баш ҡалала үткән Беренсе Халыҡ-ара урбанистика форумы йомғаҡтары буйынса Өфө егете Эрик Королев үҙенең тәҡдимдәрен белдергән. Инициативаһын ул "Ҡурайҙың ете тажы - Өфөнө үҫтереүҙең ете тәҡдиме" тип атаған.

Тәүге тәҡдим кикшерингҡа һәм велошерингҡа ҡағыла. "Халыҡ шәхси транспорттан самокаттарға һәм велосипедтарға күсеп ултырһын өсөн Өфөнө үҙгәртеп ҡора башлау кәрәк. Исмаһам, Боронғо үҙәктән булһа ла башларға, - ти ул. - Автомобиль юлдарын тарайтырға, Боронғо үҙәккә шәхси транспортты индереүҙе туҡтатырға. Киләсәктә иһә уны шәхси транспорт өсөн бөтөнләй ябырға һәм йәмәғәт транспорты хәрәкәтен генә ҡалдырырға". Октябрь Революцияһы урамындағы "Өфө Арбаты" урынына Эрик Королев Мостай Кәрим урамына тиклем арауыҡта йәйәүлеләр зонаһы эшләүҙе тәҡдим итә. "Хәҙер Боронғо үҙәк йөрәге - Арт-квадрат. Иң яҡшы йәйәүлеләр урамы Мостай Кәрим урамында - Каруанһарайҙан алып Арт-квадрат аша, Мостай Кәрим скверынан Уралсиб бинаһы һәм Якутов паркы аша буласаҡ", - ти ул. Уның өсөнсө тәҡдиме Телеүҙәктән алып Ағиҙел ярына тиклем канат юлы төҙөү. Дүртенсе тәҡдиме - Конгресс-холды ҡала халҡының әүҙемлеге өсөн асырға - унда кафелар, ресторандар, күргәҙмәләр, сувенирҙар һатыу ойошторолорға тейеш. Бишенсе тәҡдим Өфөлә тарихи биналарҙы мөмкин тиклем һаҡлап ҡалыуға йүнәлтелә. Алтынсыһы - баш ҡаланың һәр районында скейт-парк асыу. Етенсеһе - йәмәғәт транспортын таҙалығы, тәртибе, персоналының бөхтәлеге һәм иғландар булмауы менән айырылып торған "Башавтотранс"ҡа тапшырырға.
"Бына минең фантастик тәҡдимдәрем. Бының ҡасан да булһа тормошҡа ашырына бик ышанмайым, әммә мин хыялланырға яратам. Шуға күрә был тәҡдимдәрҙе махсус рәүештә ойошмаларға һәм ҡала, республика, ил ҡанундарына тәҡдим итмәйем, сөнки мин ҡаланың ябай кешеһе, ә ҡанундарҙа баш ватыу - чиновниктар эше", - тип белдерә Өфө егете.

КИРЕ СЫҒЫРҒА