"Урал батыр" эпосын башҡарыусыларҙың республика конкурсы быйыл дистанцион рәүештә уҙғарылды. Егерме икенсе тапҡыр үткәрелгән конкурста Башҡортостандың 31 район һәм 7 ҡала округтарынан, Татарстан, Ханты-Манси автономиялы округы, Канаданан 101 уҡыусы ҡатнашты.

Республиканың Баймаҡ, Баҡалы, Белорет, Бөрйән, Йәрмәкәй, Ейәнсура, Илеш, Ишембай, Мәсетле, Туймазы, Учалы райондарынан, Өфө, Сибай һәм Стәрлетамаҡ ҡалаларынан ҡатнашҡан уҡыусылар юғары һөҙөмтәләргә өлгәште. Быйылғы конкурста Гран-прины Илеш районы Ябалаҡ ауылы мәктәбенең 8-се синыф уҡыусыһы Диана Әғәлиева яуланы, етәксеһе - Лилиана Әғәлиева.
Шулай уҡ "Урал батыр" эпосын башҡарыусыларҙың XXII республика конкурсында башланғыс синыф уҡыусылары араһында I урынды Ейәнсура районы Яныбай ауылы урта мәктәбенең 4-се синыф уҡыусыһы Зәйтүнгөл Байгилдина, уртансы синыфтар араһында Бөрйән районы Аҫҡар мәктәбенән 6-сы синыф уҡыусыһы Ҡәҙриә Йәрмөхәмәтова, юғары синыф уҡыусылары араһында Стәрлетамаҡ ҡалаһы Дж. Кейекбаев исемендәге 3-сө гимназияның 8-се синыф уҡыусыһы Ләйлә Тимерғәлиева яуланы. Бынан тыш, ярышта икенсе һәм өсөнсө урындарҙа барлығы 12 уҡыусы, төрлө номинацияларҙа һәм Бөтөн донъя башҡорттары ҡоролтайы Башҡарма комитетының махсус призына лайыҡ булыусылар билдәләнде. "Мин "Урал батыр" башҡорт халыҡ эпосын 2-се синыфтан алып ятлай башланым, хәҙер тулыһынса беләм. Яңы форматта үткән конкурсҡа 3 сәғәтлек видео төшөрөп һалдыҡ. Шунан һәр ҡатнашыусы билдәле бер ваҡытта "Zoom" программаһы ярҙамында өйҙән жюриҙар менән бәйләнешкә сығып, улар беҙҙе бүлдерә-бүлдерә тыңланы. Бер аҙ тулҡынланһам да, алтынсы йыл рәттән ҡатнашыуым һәм эпосты яҡшы белеүем ярҙам итте. Әйткәндәй, былтыр "Артек" Халыҡ-ара балалар үҙәгенә барғанда ла "Урал батыр" эпосын туған телемдә яттан һөйләп, "Актерлыҡ оҫталығы" номинацияһында еңеү яулағайным", - ти Диана Әғәлиева конкурс тураһында.

КИРЕ СЫҒЫРҒА