Етеп килгән Яңы йыл менән ҡотлар алдынан милләттәштәргә тап ошо ваҡытта әйтә торған һүҙебеҙ бар. Иҫке йылды оҙатҡан, ә яңыһын ҡаршылаған тылсымлы миҙгелде әле һыҙланмай көтөп алғаныбыҙ юҡ. Ниңә? Бер уйлаһаң, ялтырауыҡлы, күңелле, ап-аҡ был миҙгелде ҡырылған күңел менән ҡаршыларлыҡ сәбәп тә юҡ һымаҡ. Икенсе яҡтан ҡараһаң - бар икән шул!

Белгестәр билдәләүенсә, ошо матур байрамда ҡулланылған алкоголле эсемлек-наркотиктар шауҡымы, шаңдауы арҡаһында төрлө зыян күргән, хатта һәләк булған граждандарҙың һаны йыл да йөҙәр меңгә етә икән. Быға өҫтәп, халыҡтың һаулығына ниндәй зыян янауын, эскелек арҡаһында күпме ғаиләнең ыҙғышыуын һәм башҡа күренештәрҙе иҫәпкә алғанда, Яңы йыл байрамдарын айыҡ үткәреү зарурлығы аңлашыла төшә, буғай.
Иғтибар итһәгеҙ, Яңы йыл байрамдарында телевизорҙа күрһәтелгән тапшырыу-фильмдарҙа әүҙем, йәки һиҙҙермәй генә "Яңы йылда шампан шарабы булһа ла эсеү кәрәк" тигән фекер үткәрелә. Шулай булғас, телевизор ҡараусылар, телевизор геройҙарынан күрмәксе, бокал сәкәштереп, эсеп ебәреүҙе әллә ни күрә. Бөтөн тәртипһеҙлектәр ошо беренсе бокалдан башлана ла инде.
Урам тәьҫиренән бигерәк, балаларыбыҙ беҙҙең тәрбиәгә еңелерәк бирелә. Яҡынса 92 процент осраҡта беренсе рюмканы балаларға ата-әсәләре тоттора. Әйҙәгеҙ, балаларыбыҙға ыңғай өлгөнө үҙебеҙ күрһәтәйек, айыҡ тормошто йәшәү нормаһы итеп алайыҡ! Ул ваҡытта бер ниндәй телевизор ҙа, төнгө урам да ғәзиздәребеҙгә ҡурҡыныс-хәүеф менән янамаҫ.
Яңы йылдан һин үҙең нимәләр өмөт итәһең, милләттәш? Моғайын, һаулыҡ, ғаилә, донъялар именлеге һәм бәхеттер. Бәхет өмөт итәһең икән, Яңы йыл байрамын бар ғаиләгеҙ, дуҫтарығыҙ, туғандарығыҙ, хатта күршеләрегеҙ менән айыҡ үткәрегеҙ!

Марат АБДУЛЛИН.

КИРЕ СЫҒЫРҒА