Башҡортостан Республикаһы Башлығы Радий Хәбиров эшлекле башҡорт милли костюмын кейеү ҡағиҙәһен раҫланы. Документ рәсми хоҡуҡи мәғлүмәт порталында баҫылып сыҡты. Ҡағиҙәләр дәүләт хеҙмәткәрҙәренә, муниципаль чиновниктарға, дәүләт органдары ведомствоһындағы ойошма етәкселәре һәм хеҙмәткәрҙәренә ҡағыла.

Радий Хәбиров Башҡортостанда эшлекле башҡорт костюмы буйынса регламент әҙерләнеүе тураһында сентябрҙә "Евразия йөрәге" халыҡ-ара сәнғәт фестивалендә ҡатнашҡан Рәсәйҙең халыҡ артисы Надежда Бабкина менән осрашҡанда уҡ әйткәйне инде. Башлыҡ бойороғонда ир-егеттәрҙең стилләштерелгән эшлекле башҡорт костюмына "ярым стойка" яғалы, ҡырын ҡаптырмалы (бортлы) кәзәкей, лампаслы йәки классик салбар, бер төҫлө күлдәк (сағыу булмаған ептәр менән сигелгән булһа ла ярай), костюм төҫөндәге аяҡ кейеме инә. Бынан тыш, камзул, бик күренеп тормаған ҡушаҡ-билбау, таҡыя, балдаҡ, "печатка" кейергә мөмкин.
Ҡатын-ҡыҙҙарҙың стилләштерелгән башҡорт костюмына еңе өстән ике өлөштән дә кәм булмаған эшлекле күлдәк, сағыу булмаған сигеүле блузка, юбка, пинжәк йәки жилет, камзул, кейем төҫөндәге классик аяҡ кейеме тәҡдим ителә. Шулай уҡ артыҡ күҙгә салынып тормаған ювелир биҙәүестәр, бижутерия, түшелдерек, мәрйен тағырға була.
Ир-егеттәрҙең дә, ҡатын-ҡыҙҙарҙың да костюмдары бер тонда булырға тейеш. Уларҙы ирекле стилдәге кейем (джинсы, шорты, үтә күренмәле блузка), кроссовка, шипатай, мокасин, босоножка, ҙур платформалы туфли менән бергә кейеү тыйыла. Иҫегеҙгә төшөрәбеҙ, традицион кейемгә моданы республика Башлығы Радий Хәбиров индерҙе. Рәсәй көнө айҡанлы байрам сараларында төбәк етәксеһе Өфө модельеры Радик Хәйруллин теккән башҡорт хәрбиҙәренең традицион камзулына оҡшаған пинжәк менән сыҡҡайны. Был пинжәкте хәҙер башҡа дәүләт хеҙмәткәрҙәрендә, муниципаль чиновниктарҙа ла күрергә мөмкин.

КИРЕ СЫҒЫРҒА