Баш ҡаланың Мостай Кәрим исемендәге 158-се Башҡорт гимназияһында Башҡортостандың атҡаҙанған мәҙәниәт хеҙмәткәре, Шәйехзада Бабич исемендәге дәүләт республика йәштәр премияһы лауреаты, шағирә Зөлфиә Ханнанова менән "Шиғриәттә халҡым тарихы" тип аталған осрашыу үтте.

Был сара Башҡортостан Яҙыусылар союзының Мәҙәниәт министрлығы һәм Бөтөн донъя башҡорттары ҡоролтайы менән берлектә иғлан ителгән "Тарих яҙыр инем ташына" тигән Республика әҙәби марафонын лайыҡлы ҡабул итеү булды. Осрашыуға марафондың кураторы, Яҙыусылар союзы рәйесе урынбаҫары Нурлан Рәшит улы Ғәниев һәм Киров районы мәктәптәренең башҡорт теле уҡытыусылары килде. Был гимназияла эшләгән уҡытыусылар ойошторған саралар һәр ваҡыт рух күтәренкелеге, телһөйәр, илһөйәр балаларҙың аһәңле сығыштары менән айырылып тора. Был юлы ла шулай булды. Уҡытыусылар аралашыу мөхитенә үҙенсәлекле йылылыҡ өҫтәһә, уҡыусыларҙың матур итеп шиғыр һөйләүе күңелдәргә май булып яғылды. Зөлфиә Ханнанова иһә үҙенең шиғриәтен яҡын иткән мәктәп коллективына ихлас рәхмәтен белдерҙе, үҙе лә шиғри күстәнәстәрен бүләк итеп, милләт тарихы, киләсәк быуынға ышаныс тураһында көслө фекерҙәрен еткерҙе. Уҡыусыларға ла, килгән ҡунаҡтар өсөн дә бик фәһемле бындай әҙәби осрашыуҙар гимназияла артабан да дауам итәсәк.

КИРЕ СЫҒЫРҒА