Ошо көндәрҙә "Башҡортостан" дәүләт концерт залында башҡорт моңона, башҡорт юморына һыуһаған баш ҡала тамашасылары өсөн "Ҡармаҡ" музыкаль-юмористик шоу үткәрелеүе хаҡында хәбәр иткәйнек инде. Был йырлы-көлкөлө кисә юморға ҡоролған башҡа сараларҙан мәҙәктәрҙең юғары мәҙәниле булыуы менән айырылып торҙо.

Тамаша башланыуына ишаралап, сәхнәгә ҡармаҡ тотҡан балыҡсылар килеп сыҡты. Өс балыҡсы - Илсур Тайсин, Шәһит Хамматов һәм Иҙел Аралбаев донъя мәшәҡәттәренән арынып, тын ғына тулҡындар тауышын тыңлап, ара-тирә гәпләшеп ултырырға ниәтләгән икән. Һәм шунда уҡ был сарала ысын ир-егеттәр юморы өҫтөнлөк итәсәген аңланыҡ. Ысынлап та нәҡ шулай булды ла: һуңғы көндәрҙә ил-йортта барған хәл-ваҡиғаларҙың иң әһәмиәтлеләрен, мәсьәләләрҙең иң көнүҙәген һайлап ҡына тос мәрәкәләне улар. Мәҙәкселәрҙең күҙ уңынан мәҙәниәт, сәнғәт, сәйәсәт өлкәһендәге мөһим яңылыҡтар ҙа, йәмғиәттәге төрлө күренештәр ҙә ситтә ҡалманы. Әгәр шундай хәл мөмкин булып, һуңғы яңылыҡтарҙа хәбәрҙар булмаған берәү табылһа, уға "Ҡармаҡ"ты тамаша ҡылыу ҙа етер ине.
Ә ҡайһы бер тамашасылар сәхнәлә үҙен, йә яҡындарын да танығандыр: арабыҙҙа "хайп" артынан ҡыуып, оятын онотоусылар ҙа, үҙен "уңышҡа көйләгән" оҫталыҡ дәрестәре үтеп, яҡындарын өгөтләүселәр ҙә юҡ түгел. Йәмғиәтебеҙҙәге бына шундай төҙәтерҙәй күренештәрҙе күреп тотоп ала белгән тамашаның сценарий авторҙары Айбулат Сәсәнбаев һәм Рәйсә Абдуллина, афарин! Улар өр-яңы мәҙәк образдар - турист килерен көткән Бөрйән кешеһен, халыҡҡа интернет селтәрҙәре ярҙамында яҡынайырға тырышҡан депутат һәм йәш блогерҙы сәхнәгә сығарҙы. Тамашасыны "балыҡсыларҙың" үҙенә ҡатын-ҡыҙ ролен "кейеп" ҡарамауы ла арбаны, сөнки күптән уйналған был образ һөйкөмлөгөн юғалтҡан инде.

Шулай итеп, биткә ҡыҙыллыҡ килтергән билдән түбән шаяртыуҙар булмауы - "Ҡармаҡ"тың төп үҙенсәлеге һәм өҫтөнлөгө булды. Беҙ, ниһайәт, башҡорт юморының нескәлеген тойҙоҡ, "Себергә барам әле" кеүек шаян "вахта-ара йыр"ҙарыбыҙҙы хәтергә төшөрҙөк. Бына шундай сәғәт ярым ваҡыт эсендә көлдөрөп тә, уйландырып та, күңелдәрҙе елкендереп тә ебәрерҙәй тамаша ойошторҙо Рита Өмөтбаева етәкселегендәге "ҠурайТВ" каналының командаһы: режиссерҙар З. Баймырҙина һәм А. Ғәликәева, музыкаль яҡтан биҙәүсе У. Мөхәмәтйәров, графика Р. Зиаитдинов, оператор В. Асҡаров һәм "Ҡармаҡ" юмор клубы ағзалары.

ӘЙТКӘНДӘЙ...
Тиҙҙән, апрель айы аҙағында, "Ҡурай ТВ" каналы "Башҡорт йыры"на 10 йыл тулыу айҡанлы баш ҡала халҡына өр-яңы бүләк-сара әҙерләй: легендар композитор Рим Хәсәновтың иң билдәле йырҙарынан торған "Һаумы, Маэстро!" тип аталған концерт уҙғарыла. Меңдәр күңелен моңо, аһәңе менән арбаған йырҙар авторының ижад донъяһына сәйәхәткә саҡыра ойоштороусылар.

Сәриә ҒАРИПОВА.

КИРЕ СЫҒЫРҒА

+  -