"Тамыр" балалар-үҫмерҙәр телеканалы "Ҡош юлы" йәштәр хәрәкәте менән бергә "Ҡош юлы. Балалар" дүртенсе телевизион конкурстың финалын үткәрҙе.

Бөтә республиканан 10 бала проекттың финалына йыйылды. Беренсе көндө "Йәйғор" шифаханаһында улар үҙҙәренең сығыштарын әҙерләне. Тимер Йосопов, Альбина Шәмсетдинова, Ришат Сөләймәнов, Ренат Абдулов һәм Илмира Имамова үҫмерҙәр менән йыл башынан эшләне. Уларҙың йәнле аралашыуын телетамашасы аҙна һайын Башҡортостан юлдаш һәм "Тамыр" каналдарында ҡараны. Билдәле музыкант, "Башкавер" төркөмө етәксеһе Илгиз Муллағаләмовтың оҫталыҡ дәресе, телепроект өсөн интервью, репетициялар, киске ултырыуҙар - быларҙың барыһын да ойоштороусылар балалар өсөн әҙерләне. Финал концерт С. Аксаков исемендәге баҡсала үтте. Унда ҙур ижадҡа тәүге аҙымын яһаған балаларҙың йыры яңғыраны. Күбеһе үҙе сығарған йырҙы башҡарҙы. Уларҙы "Ҡош юлы" йәштәр фестивале лауреаттары, билдәле автор башҡарыусылар Тимур Ямалов, Миңзәлә Яхина, Артур Кәбиров, Рөстәм Миһранов, шағирә Наҙгөл Ғәлиева, "Тамыр" телеканалы директоры Гөлназ Ҡолһарина баһаланы. Гөлназ Ҡолһарина билдәләүенсә, "Ҡош юлы. Балалар" гитара һәм йыр тураһында ғына түгел. Ул был тормошта үҙеңде, һүҙеңде, юлыңды табыу тураһында ижади реалити-шоу.
Финалға сығыусы Әбйәлил районынан Фидан Абдуллин, Күгәрсен районынан Илүзә Ҡыҙрасова һәм Алһыу Ғәббәсова, Дыуан районынан Зарина Әхмәтғәлина, Өфөнән Арыҫлан Мостафин, Белорет районынан Гөлдәриә Ғималетдинова диплом һәм "Музыкаль арсенал" магазинынан сертификат, махсус номинацияларҙа приздар менән бүләкләнде. Дәүләт Думаһы депутаты Зариф Байғусҡаров "Тамыр" телеканалы режиссеры Ләйсән Мәзитоваға Рәхмәт хаты, Мәләүез ҡалаһынан өсөнсө урын яулаған Айбулат Әхмәтшинға исемле сәғәт тапшырҙы. Ейәнсура районынан икенсе урынға сыҡҡан Рәлиф Бикташев "Самрау" нәшриәте призына лайыҡ булды. Беренсе урынды һәм Бөтөн донъя башҡорттары ҡоролтайы призын Әбйәлилдән Динислам Ишмырҙин алды. Конкурстың Гран-приһын һәм төп призын Әбйәлилдән Нәркәс Баймырҙина яуланы. Уны меценат музыкант Рөстәм Миһранов тапшырҙы.

КИРЕ СЫҒЫРҒА