Исемегеҙҙең нимә аңлатҡанын, атай-әсәйҙәрегеҙҙең исеменә ниндәй мәғәнә һәм сер йәшеренгәнен, республикала һәм унан ситтә күпме аҙашығыҙ йәшәгәнен һәм башҡа мәғлүмәтте белгегеҙ, ул ғына ла түгел, уларҙы асыҡлауҙа үҙегеҙ ҙә ҡатнашҡығыҙ киләме? Мәҫәлән, киң таралған Айгөл исеме барлығы барыбыҙға ла билдәле, ә бына Ҡырғыҙстандың Баткен районында ғына үҫкән, лилиәләр ғаиләһе, рябчиктар ырыуына ҡараған Айгөл исемле күп йыллыҡ үҫемлек барлығын беләһегеҙме? Юҡтыр, быны быға тиклем беҙ ҙә белмәй инек...

Шундай ҡыҙыҡлы мәғлүмәттәр табырға һәм уларҙы бер урынға тупларға, исемегеҙгә бәйле башҡа серҙәрҙең төбөнә төшөргә теләһәгеҙ, Башҡорт Википедияһының "Башҡорт исемдәре - 2021" тип аталған ижади конкурсына рәхим итегеҙ! Уның төп маҡсаты - башҡорт теленең һүҙ байлығын өйрәнеү, башҡорт исемдәренең тылсымлы серен асыҡлау, интернетта башҡорт теле даирәһен артабан үҫтереү, исемдәр аша халҡыбыҙҙың билдәле шәхестәре, шәхес исемдәре менән бәйле республиканың ер-һыу атамалары, тарихи-мәҙәни объекттары тураһында мәғлүмәтте барлыҡ донъяға еткереү.
Конкурс 2021 йылда Башҡортостан Республикаһы Граждандар йәмғиәтенә булышлыҡ итеү фондының Энциклопедик белем таратыуға булышлыҡ итеүсе "Викимедиа РУ" коммерцияға ҡарамаған партнерлығына бирелгән Башҡортостан Республикаһы Башлығы гранты сараларын тормошҡа ашырыу сиктәрендә ойошторола. Конкурс мәктәп йәшендәге балалар, үҫмерҙәр һәм йәштәр өсөн тәғәйенләнә. Конкурста шулай уҡ теләге булған һәр кем ҡатнаша ала. Сикләүҙәр юҡ. Конкурста ҡатнашыусыларҙың ижади эшенә 2021 йылдың октябрь-ноябрь айҙарында йомғаҡ яһала. Әүҙем ҡатнашыусыларға виртуаль миҙалдар бирелә, шулай уҡ "Аҡбуҙат", "Аманат", "Шоңҡар" журналдарына һәм "Йәншишмә", "Йәшлек" гәзиттәре грант иҫәбенә бушлай яҙҙырыла, иң-иңдәргә "Озон" интернет магазины сертификаты тапшырыла. Ә инде еңеүселәргә ярҙам итеүсе ололарға йәки уларҙың остаздарына ойоштороусыларҙың электрон Рәхмәт хаты тапшырыла. Балаһына матур исем биреү ата-әсә бурыстарының иң яуаплыһы. Исем менән кешенең киләсәк тормошо билдәләнә, сөнки һәр исемгә тылсымлы сер һалынған. Ә һеҙ ошо сер артынан тормош диңгеҙендәге Исемдәр утрауына юлланырға әҙерме?

Зәйтүнә НИҒӘМӘТЙӘНОВА.

КИРЕ СЫҒЫРҒА