Ниһайәт, был интернет тамам ялҡытты мине. Уның арҡаһында телевизор менән элек яратып уҡыған гәзит-журналдарымдан айырылдым. Телевизоры ярай инде, уны барыбер ҡарағы килмәй, ә бына гәзит-журналһыҙ күңел ҡорғаҡһыны.

Телевизорҙы әйтәм, гел бер үк йөҙҙәр, бер үк һүҙҙәр, тигәндәй. Бер ниндәй күңелгә ятышлы тапшырыуҙар юҡ, туҡтауһыҙ йүнһеҙ рекламалар, тоҙһоҙ, бер-береһенә оҡшаш сериалдар йәнгә тейә, етмәһә. Шул уҡ Соловьев та, Малахов. Дөрөҫ, һирәкләп кенә БСТ-ны ҡарап алам былай. Тик барыбер гәзит-журналға етмәй инде. Күрәләтә туған телдәге баҫмаларыбыҙҙан алыҫлашҡаным өсөн үҙемде әрләп бөтөрә алмайым. Уларҙы сайттарынан уҡыйым, имеш. Юҡ шул, күптәр шулай тип үҙҙәрен алдатһа ла, яратҡан гәзит-журналыңды сайттан уҡыу - буш һүҙ ул, барыбер танһыҡты ҡандырмай. Сөнки, беренсенән, сайтҡа бөтөн мәҡәләләр ҙә һалынмай; икенсенән, уҡығаның елгә осоп торғандай: иҫтә лә ҡалмай, төпләмә итеп туплап барырға ла булмай. Ә мин бит гәзитемде ҡулға тотоп, башынан аҙағынаса ала-һала уҡып сығырға ғәҙәтләнгәйнем.
Әйтеүемсә, интернет ялҡытты, хәҙер смартфонды мин һауа торошон ҡарап алыу һәм көн яңылыҡтарына күҙ йүгертеп сығыу өсөн генә ҡабыҙам. Элеккеләй, төн йоҡоларымды ҡалдырып, бәйләнештә лә ултырмайым, сөнки күпселек көнкүреш һәм ғаилә проблемаларын уҡый барып, гел ҡатын-ҡыҙарҙан торған төркөмдәштәрҙең нимә тип әйтерҙәрен алдан белеп торам. Комменттарҙа йыш ҡына бәхәс, талаш ҡуба, ғәйбәт китә, хатта һүгенеүҙән дә тартынып тормай ҡай берәүҙәр. Фейк хәбәрҙәр ҙә ялҡытты. Смартфон һатып алырҙан элек йәнгә тыныс ине, иҫке булһа ла, төймәле бәләкәй генә телефонымды фәҡәт шылтыратыу өсөн тотондом һәм күп йылдар инде "Киске Өфө" гәзите менән "Ағиҙел" журналын алдырып, яратып уҡый торғайным. Иҫке ғәҙәт үҙенекен итте, түҙмәнем: почтаға барып, Путин аҡсаһынан арттырып, сентябрь урталарында уҡ ошо йылдың ҡалған өс айына һәм киләһе йылдың тәүге ярты йыллығына " Киске Өфө" гәзите менән "Ағиҙел" журналына яҙылып ҡайттым. Үҙ телебеҙҙәге яҙма баҫмаларға етмәй инде, шуны аңланым. "Киске Өфө"лә баҫылған мәҡәләләр тәрбиәүи йәһәттән фәһемле лә, ғибрәтле лә. Тема төрлөлөгө, файҙалы мәғлүмәттәре заман проблемалары менән хәбәрҙар булырға ярҙам итә, рухиәтебеҙҙе байыта, милләтем менән бәйләнеште нығыта, юғиһә интернет селтәренең рухыма ят виртуаль донъяһы тотҡононда аҙашып йөрөгәндәй хис итә инем үҙемде. Әсә телемдәге матбуғатҡа яҙылып, әйтерһең дә, үҙ йортома ҡайтып ингәндәй булдым.

Мәғәфүрә ИШКИЛДИНА,
хеҙмәт ветераны.
"Киске Өфө" гәзите, №45, 2021 йыл

КИРЕ СЫҒЫРҒА