Ошо көндәрҙә Өфөлә "Байыҡ" башҡорт бейеүҙәрен башҡарыусыларҙың сираттағы телевизион конкурсы үтте. Бына инде 13 йыл рәттән ойошторолоп килгән иҫ киткес энергиялы һәм матур, ысын мәғәнәһендә халыҡ фестиваленә әүерелгән сарала Рәсәйҙең төрлө төбәктәренән 20 меңдән ашыу бейеүсе ҡатнашып өлгөрҙө.

"Байыҡ" быйыл да башҡорт бейеү сәнғәтенең рухи сағылышына, ысын байрамға әүерелде. Унда Башҡортостандың, Санкт-Петербург, Сорғот, Силәбе өлкәһенең Һатҡы ҡалаһынан оҫта бейеүселәр һәм матур коллективтар ҡатнашты. Уларҙың барыһы ла Бөтөн донъя башҡорттары ҡоролтайының махсус призына лайыҡ булды.
"Йыл сәхнәләштереүсеһе" исемен иғлан итеү конкурстың иң тулҡынландырғыс һәм ҡыуаныслы өлөшө булғандыр. Был юғары баһаға Башҡортостандың атҡаҙанған артисы Хәлил Ишбирҙин лайыҡ булды һәм уға 100 мең һумлыҡ премия тапшырылды. Хәлил Әнүәр улы Стәрлетамаҡ бейеү театрына нигеҙ һалыусы, "Бөрйән егеттәре", "Порт Артур" һәм башҡа бик күп танылған бейеүҙәр авторы булараҡ барыһына ла яҡшы таныш. Бөгөн ул республиканың район-ҡалаларында балаларға бейеү сәнғәтенең серҙәрен аса. Быйылғы "Байыҡ" конкурсында башҡорт бейеүенең легендаһы 20 йыл үткәндән һуң уҡыусылары менән бергә йәнә сәхнәгә күтәрелде һәм көслө, йөрәктәрҙе елкендерер пластик спектакль күрһәтте. Ә бына "Байыҡ" телевизион конкурсының алыштырғыһыҙ баһалама ағзаһы, Башҡортостандың халыҡ артисы Ратмир Бәҙретдиновтың яҡты иҫтәлегенә булдырылған махсус премия сығышы менән Учалы районынан Айназ Низаметдиновҡа тапшырылды. Шулай уҡ "Халыҡ бейеүсеһе" номинацияһында Учалының "Ләйсән" ветерандар ансамбле етәксеһе Ғәлимйән Хилажев, ә "Рәсәй Федерацияһында халыҡ бейеүен пропагандалаған өсөн" номинацияһында Санкт-Петербургтан Александра Соловьева еңеүсе тип табылды. Ике һайлап алыу туры йомғаҡтары буйынса "Иң яҡшы йыл етәксеһе" исеменә Стәрлетамаҡ ҡалаһынан Лиана Бурмистрова лайыҡ булды.
Шулай итеп, "Байыҡ" йылдан-йыл тамашасыларын оҫта бейеүселәре менән генә түгел, яңы һәм үҙенсәлекле бейеүҙәре менән дә һоҡландыра. Яңы асыштарға, таланттарға быйыл да бай булған конкурстың Гран-приһына лайыҡ булған бейеүселәр һәм коллективтарҙы телевизор ҡараусылар тиҙҙән Башҡортостан юлдаш телевидениеһы һәм Ҡурай-ТВ каналдарындағы тапшырыуҙарҙан ҡарай аласаҡ.

"Киске Өфө" гәзите, №48, 2021 йыл

КИРЕ СЫҒЫРҒА