Республикала 14 декабрҙә Башҡорт теле көнө һәм бөйөк мәғрифәтсе Мифтахетдин Аҡмулланың тыуыуына 190 йыл тулыу айҡанлы уҙғарыласаҡ бихисап ҡыҙыҡлы һәм йөкмәткеле саралар "Ете аҙым" концепцияһына берләштерелеп, бөйөк Аҡмулланың "Нәсихәттәр"ендә билдәләнгән ете рухи ҡиммәткә нигеҙләнә.

Марафонға старт 7 декабрҙә бирелде. Артабан ете көн дауамында ете төшөнсәнең асылы, мәғәнәһе яҡтыртыла барасаҡ һәм был Башҡорт теле көнөнә тиклем дауам итәсәк, тип планлаштырылды: мәҫәлән, 7 декабрҙә - "Башҡорт теле - иман теле", 8 декабрҙә - "Башҡорт теле - күңелем көҙгөһө", 9 декабрҙә - "Башҡорт теле - аҡыл теле", 10 декабрҙә - "Башҡорт теле - шөкөр теле", 11 декабрҙә - "Башҡорт теле - әҙәп теле", 12 декабрҙә - "Башҡорт теле - сабырлыҡ теле", 13 декабрҙә - "Башҡорт теле - ихласлыҡ теле".
Ошо ете көн эсендә бик күп мәғәнәле, матур саралар уҙҙы һәм уҙасаҡ. Мәҫәлән, "Без башкортлар" башҡорт рок-башҡарыусылары, "М. Аҡмулланың аҡ юлы" әҙәби кисәләре, йәштәр өсөн "Йомробаш" интеллектуаль уйыны, Башҡортостандың милли инновациялы мәктәптәре етәкселәре форумы, "Телгә бәйле..." старт-сессияһы.
Унан тыш, Ғафури районында Жәлил Кейекбаевҡа бюст асыласаҡ, "Дан юлдар үткән уҙамандар" темаһына түңәрәк өҫтәл ойоштороласаҡ. Башҡортостан Башлығы грантына "Кубоктар лигаһы" КВН финалы, "Әсәм теле - сәсән теле" шиғри бәйгеһе үтәсәк. Тағы ла сағыу саралар иҫәбенә М. Аҡмулланың тыуыуына 190 йыл тулыуға бағышланған байрам концерты инә, унда мәғрифәтсе исемендәге премия лауреаттары билдәләнәсәк. 14 декабрҙә М. Аҡмулланың һәйкәленә сәскә һалынасаҡ, стипендиаттарға махсус премиялар тапшырыласаҡ. Уҡыусылар өсөн башҡорт теленән берҙәм онлайн-дәрес үтәсәк.
Шулай уҡ "Тамға" башҡорт милли кейеме оҫталарының халыҡ-ара конкурсы, "Башҡорт теле - яңы ҡараш" башҡорт телен популярлаштырыу һәм үҫтереү проекттарын презентациялау, "Ритайым" йәштәр сараһы ойоштороласаҡ, һәр районда тематик саралар уҙасаҡ.
Белем биреү ойошмаларында ла бер йүнәлешле саралар үткәреү ҡаралған. Шулар иҫәбендә башҡорт телендә радио, телевидение көнө; Аҡмулла шиғырҙарын башҡортса һәм "AkmullaWorld Challenge" сит телдәрҙә уҡыу видеомарафоны; башҡорт теле буйынса этноквизы; "Бикбай уҡыуҙары" төбәк-ара конкурсы һәм башҡалар планлаштырылған.

"Киске Өфө" гәзите, №50, 2021 йыл

КИРЕ СЫҒЫРҒА