Башҡортостан Башлығы Радий Хәбиров баш ҡаланың Инорс биҫтәһендә урынлашҡан Йылы күлдең һәм Баландин бульварының тирә-яғын төҙөкләндереү проекты менән танышты.

Өфө ҡалаһы хакимиәтенең Архитектура һәм ҡала төҙөлөшө идаралығы начальнигы урынбаҫары Ольга Сарапулова проекттың ике этапҡа бүленеүе тураһында һөйләне. Беренсе этапҡа Мушников урамындағы 7/3 һәм 13/8 йорттарынан Йылы күлгә тиклем Баландин бульвары буйындағы территория инә. Бында рөхсәт ителмәгән парковка урынына бер һыҙатлы сквер рәүешендәге йәйәүлеләр юлы, ял урыны, парковка урындары буласаҡ. Тотош биләмәне йәшелләндереү һәм яҡтылыҡ үткәреү, яр буйында төрлө йәштәге балалар өсөн балалар майҙансыҡтары, теннис уйнау урындары, спорт, әүҙем ял майҙансыҡтары, һыу буйында күҙәтеү майҙандарын булдырыу планлаштырыла. Һыу инеү хәүефле булған урындарҙа һыуға төшөү ябыласаҡ. Һыуҙан алыҫтараҡ ҙур булмаған майҙансыҡ - амфитеатр, өҫтәл уйындары өсөн япмалы майҙансыҡ эшләү планлаштырыла. Уның эргәһендә балалар өсөн ҡом майҙансығы һәм воркаут майҙансығы күҙаллана.
Халыҡ менән аралашыу ваҡытында Радий Хәбиров, территорияны төҙөкләндергәндә кешеләр өсөн уңайлыҡтар булдырыу мөһимлеген, ҡарт ағастарҙы киҫеп, улар урынына йәштәрен ултыртыу кәрәклеген билдәләне. Башҡортостан Башлығы фекеренсә, күлдең тәбиғи асылын һаҡлап ҡалыу зарур. "Миңә проект буйынса фекер алышыуҙа биҫтә халҡының әүҙем ҡатнашыуын һәм уларҙың фекере иҫәпкә алыныуын белеүем мөһим ине. Йылы күл территорияһын төҙөкләндереү эшен киләһе йылда тамамларға ниәтләйбеҙ. Бөгөн Инорс биҫтәһе әүҙем үҫә, быйыл 1 сентябргә беҙ бында республикалағы иң ҙур мәктәптәрҙең береһен асасаҡбыҙ", - тине Радий Фәрит улы.
Барлыҡ маршруттар, автомобиль юлдары һәм төп майҙансыҡтар яҡтыртыласаҡ. Бәләкәй архитектура формалары заманса нейтраль стиль буйынса һайланған һәм тәбиғи мөхитте тулыландырып торасаҡ. Проект буйынса скверҙа кофе һәм ризыҡтар һатылған павильон ҡуйыу ҙа күҙаллана. Икенсе этапта Баландин бульвары буйлап Йылы күлдең тирә-яғын төҙөкләндереү планлаштырылған. Бында йәшелләндерелгән ял зоналары булған киң тротуар һалынасаҡ. Баландин бульвары менән Мушников урамы сатында реабилитация үҙәге эргәһендә майҙанды һәм скверҙы төҙөкләндереү ҡарала. Күл тирәләй велосепидсылар, йәйәүлеләр өсөн маршруттар, понтон пирстары һәм һыу буйында ял итеү майҙансыҡтары, пикник урындары, эттәрҙе йөрөтөү һәм күнекмәләр үткәреү урыны, пляж территорияһын үҙгәртеп ҡороу тәҡдим ителә.

Азат ҒИЗЗӘТУЛЛИН.
"Киске Өфө" гәзите, №4, 2022 йыл

КИРЕ СЫҒЫРҒА