Башҡортостандың халыҡ шағиры Рәми Ғариповтың "Туған тел" шиғырын бөгөн кем генә белмәй ҙә, кемдәр генә яратып яттан һөйләмәй! Кескәйҙәрҙән алып, өлкәндәргә тиклем бөтәбеҙҙең дә йөрәк һүҙенә, туған телгә һәйкәлгә әүерелде ул.

Аңы бар кеше аңларға тейеш: был шиғыр һәр бер милләт кешеһенә, донъяла күпме халыҡ бар - шуларҙың барыһына ла ҡағыла, ә бер башҡорт теленә генә түгел. Был әҫәр, асылда, ысын мәғәнәһендә интернациональ шиғыр, уны һәр милләт вәкиле үҙенең теле хаҡында тип һөйләй һәм ҡабул итә ала. Иғтибар итһәгеҙ, бының шулай икәненә БСТ каналынан Рәми Ғариповтың тыуыуына 90 йыл тулыуға һәм Халыҡ-ара туған телдәр көнөнә арналған видеороликтар серияһын ҡарап та инанырға була: Башҡортостанда йәшәгән тиҫтәләгән милләт вәкиле һәр береһе үҙ туған теленә тәржемә ителгән ошо "Туған тел" шиғырын яттан һөйләй! Рәмиҙең был шиғырын рус та, белорус та, украин да, ҡаҙаҡ та, үзбәк тә, мари менән удмурт һәм башҡалар ҙа үҙ теленә ҡағыла тип ҡабул итә - әҫәрҙең бөтөн ҡиммәте шунда ла.

Зөһрә ҠОТЛОГИЛДИНА,
шағирә.
"Киске Өфө" гәзите, №6, 2022 йыл

КИРЕ СЫҒЫРҒА