Баш ҡалабыҙ тағы бер иҫтәлекле урынға байыны - Өфөнөң Киров районында, көньяҡтан инеү урыны эргәһендә 20 метр бейеклектәге "Өфө - хеҙмәт ҡаһарманлығы ҡалаһы" стелаһы асылды.

Тантанала сығыш яһап, Башҡортостан Башлығы Радий Хәбиров был монументтың фронт батырҙары менән бер рәттән Бөйөк Еңеүҙе яҡынайтҡан тыл хеҙмәткәрҙәренә хөрмәт билдәһе булыуын билдәләне. "Һуғыш йылдарында Өфөгә тиҫтәләрсә эре предприятие, дәүләт учреждениелары, фәнни институттар эвакуациялана. Тотош республика фронт ихтыяжы өсөн эшләй. Башҡортостан хеҙмәтсәндәре иген үҫтерә, фронтҡа кейем-һалым тегә, нефть сығара, танкылар һәм самолеттар өсөн яғыулыҡ, хәрби авиация өсөн двигателдәр етештерә. Республика халҡы аҡсаһына бронепоезд, танкылар, тотош авиаэскадрильялар һәм башҡа ҡорал эшләнә. Йөҙҙәрсә эвакуацияланған ғаиләләр ҡабул ителә, яралылар дауалана. Өфө һәм республика халҡының хеҙмәт фиҙаҡәрлеген танып, Рәсәй Президенты баш ҡалабыҙға "Хеҙмәт ҡаһарманлығы ҡалаһы" тигән маҡтаулы исем биреү тураһында указ ҡабул итте. Беҙ бының менән сикһеҙ ғорурланабыҙ һәм Владимир Владимировичҡа был ҡарары өсөн рәхмәтлебеҙ.
Ололар менән бер рәттән, станоктар артына баҫып, ошо йылдарҙың тере шаһиты булған "һуғыш балалары"ның ҡаһарманлығы ла баһалап бөткөһөҙ. Бында ейәндәрен алып килеп, улар үҙҙәренең ҡаһарман бала сағы һәм үҫмер йылдары тураһында бәйән итер. Беҙ оло быуындың лайыҡлы вариҫтары булырға ынтылырға тейеш. Беҙгә лә Тыуған илде һаҡларға әҙерлегебеҙҙе, илһөйәрлегебеҙҙе эштә раҫлау ваҡыты етте. Әлеге ваҡытта алғы һыҙыҡта булған егеттәребеҙгә терәк булайыҡ. Уларға нацизмды еңергә фиҙаҡәр хеҙмәтебеҙ менән ярҙам итәйек", - тине Радий Фәрит улы.
Шулай уҡ иҫтәлекле ваҡиға менән республика халҡын Рәсәй Президенты ярҙамсыһы Владимир Мединский, Өфө ҡалаһы хакимиәте башлығы Ратмир Мәүлиев, "Гидравлика" предприятиеһында 50 йылдан ашыу эшләгән Ждановтарҙың хеҙмәт династияһы вәкиле Алексей Портянко тәбрикләне. Республика Башлығы белдереүенсә, киләсәктә бында асыҡ һауалағы музей ҙа буласаҡ һәм унда Бөйөк Ватан һуғышы йылдарында сығарылған продукция күрһәтеләсәк.

"Киске Өфө" гәзите, №45, 2022 йыл

КИРЕ СЫҒЫРҒА