Ауылыбыҙҙа Сибай театр-концерт берекмәһенең "Сулпан" балалар театры А.П.Чеховтың "Каштанка" хикәйәһе буйынса сәхнәләштерелгән спектакль менән сығыш яһаны. Иҫке Монасип ауыл биләмәһенә ҡараған өс ауылдың уҡыусылары менән зал шығырым тулды. Хатта балалар баҡсаһынан 2 генә йәшлектәренән алып береһе лә ҡалмай йыбырлашып килеп тамаша ҡылдылар.

Сибай актерҙары, һәр ваҡыттағыса, беҙҙе һоҡландырып, оҫта уйнанылар, балаларҙың йотлоғошоп ҡарауы ла быға дәлил ине. Әҫәр үҙе лә тәрбиәүи яҡтан бик фәһемле булды. Тамаша бер тынала ҡаралды. Шулай ҙа...
Күңелдә ялған өмөт китеге ҡалды. Был тәнҡит тә түгел һәм әлеге спектаклгә лә ҡағылышы юҡ. Сибайҙар килә, тигәс, ниңәлер, актерҙар тарафынан матур яңғыраған саф башҡортса сығыш көткәйнек. Бөгөнгө көндә балаларыбыҙ интернет йоғонтоһо менән русса аралашыуға күсеп барғанда, башҡортса йәнһүрәт, кинофильмдарҙың аҙ булыуын, ауылдарҙа балалар өсөн спектакль-концерттарҙың һирәк күрһәтелеүен иҫәпкә алғанда, һуңғы 10 йылда тәүгә килгән театрҙың башҡортса сығыш яһауы бик ваҡытлы, кәрәкле һәм мөһим сара булыр ине лә бит. Юҡ, башҡорт театры башҡорт ауылына килеп, рус телендә сығыш яһаны...
Балалар өсөн эшләгән театрҙар, йыр, бейеү ансамблдәре, һеҙгә мөрәжәғәт итәбеҙ: килегеҙ беҙгә, беҙ һеҙҙе әлегеләй зал тултырып ҡаршыларбыҙ. Тик шуны онотмағыҙ: балаларыбыҙҙы башҡорт рухында тәрбиәләү, уларҙың кескәй йөрәгендә халҡыбыҙҙың мәҙәниәтенә, сәнғәтенә оло һөйөү уятыу, башҡорт телендә матур итеп аралашыуҙың мөһимлеген аңлатыу өсөн һеҙҙең сығыштарығыҙ беҙгә ҙур ярҙам булыр ине.

Динара ҠОТЛОБАЕВА.
Бөрйән районы.
"Киске Өфө" гәзите, №45, 2022 йыл

КИРЕ СЫҒЫРҒА