Өфөнөң Совет майҙанында Салауат Юлаев исемендәге өсөнсө ирекле башҡорт батальонын оҙатыу тантанаһы уҙҙы. Батальон хәрби бүлексәләр ветерандары башланғысы менән ойошторолдо. Башҡортостан Башлығы Радий Хәбиров был идеяны хупланы. Батальон айырым хәрби берәмек булараҡ Рәсәй гвардияһы составына инде.

Хәрбиҙәрҙе оҙатыу тантанаһы республика етәксеһе Радий Хәбировтың һәм Рәсәй милли гвардияһы ғәскәрҙәренең Волга буйы округы командующийы вазифаһын ваҡытлыса башҡарыусы генерал-лейтенант Руслан Султыговтың Рәсәй Геройы, легендар комдив Миңлеғәле Шайморатов һәйкәленә сәскәләр һалыуынан башланды."Махсус хәрби операция башланғандан алып меңәрләгән ир-егет хәрби бурысын үтәй, илебеҙҙе һаҡлай, батырлыҡ һәм ҡыйыулыҡ күрһәтә. Уларға ярҙам кәрәк. Бөгөн тотош республика исеменән һеҙгә Тыуған илде яҡлау тураһында ҡарар ҡабул иткәнегеҙ өсөн рәхмәт белдерәм. Миңлеғәле Шайморатов һәм Александр Доставалов исемендәге батальондарҙың яугирҙарына ярҙам итеп торабыҙ, һеҙҙең хаҡта ла хәстәрлек күрәсәкбеҙ. Ғаиләгеҙҙе, туғандарығыҙҙы һәм яҡындарығыҙҙы ярҙамыбыҙҙан ташламабыҙ. Һеҙгә ныҡлы вәғәҙә бирәм. Тап ошо майҙандан ата-бабаларыбыҙ фашистарға ҡаршы һуғышҡа киткән. Бөгөн һеҙ ошо хәрби батырлыҡты дауам итәһегеҙ. Минең артта - генерал Шайморатов һәйкәле. Уның "Салауат тоҡомдары сигенә белмәй!" тигән девизын онотмағыҙ. Һеҙҙең хәрби бурыстарҙы үтәп, иҫән-һау әйләнеп ҡайтыуығыҙҙы көтәбеҙ", - тине Радий Хәбиров батальон яугирҙарына мөрәжәғәт итеп. Республика етәксеһе хәрби подразделение командиры, подполковник Дмитрий Ф.-ҡа Салауат Юлаев исемендәге башҡорт батальоны байрағын тапшырҙы. "Батальондың шәхси составы араһында - 48 хәрби хәрәкәт ветераны, 12 яугир махсус хәрби операцияла ҡатнашҡан. Салауат Юлаев исемендәге батальондың шәхси составы исеменән һеҙҙең ышанысығыҙҙы аҡларбыҙ, хәрби бурыстарҙы лайыҡлы һәм намыҫлы үтәрбеҙ тип ышандырам", - тине батальон командиры.
Рәсәй Федерацияһы милли гвардияһы ғәскәрҙәренең Волга буйы округы командующийы вазифаһын ваҡытлыса башҡарыусы генерал-лейтенант Руслан Султыгов үҙ сығышында 81 йыл элек, 1941 йылдың декабрендә, данлыҡлы 112-се Башҡорт атлы дивизияһының ойошторолоуы һәм уның командиры итеп хәрби генерал Миңлеғәле Шайморатовтың тәғәйенләнеүе хаҡында тағы бер тапҡыр иҫләп үтте.
Тантаналы марш менән атлап үткәс, батальон яугирҙары туғандары һәм яҡындары менән хушлашты.

"Киске Өфө" гәзите, №51, 2022 йыл

КИРЕ СЫҒЫРҒА