Үткән йыл аҙағында Өфө Фән һәм технологиялар университетының башҡорт филологияһы, көнсығышты өйрәнеү һәм журналистика факультетында "Башҡорт яҙма әҙәбиәте" антологияһының исем туйы булды. Сарала Тарих, тел һәм әҙәбиәт институты ғалимдары, М. Аҡмулла исемендәге башҡорт педагогия университеты уҡытыусылары, Өфө университетының ғалимдары ҡатнашты.

Антология ике томдан тора. Беренсе томға V-XVIII быуаттарға ҡараған төрки-башҡорт яҙма ҡомартҡылары ингән. Орхон-Йәнәсәй ташъяҙмаларындағы текстар, төрки шағирҙары Йософ Баласағунлының "Ҡотаҙғу белек", Әхмәт Йүгнәкиҙең "Һибәт әл-хакаик" әҫәрҙәре, Ҡорҡот ата китабы, Ҡол Ғәлиҙең "Йософ ҡиссаһы", Сәиф Сараи, Ҡотоб һәм башҡа авторҙарҙың әҫәрҙәре хәҙерге башҡорт телендә бирелә.
Икенсе томға XVI-XVIII быуаттарҙа ижад ителгән тарихи-функциональ текстарҙан, сәйәхәтнамәләрҙән, Батырша хатынан, Тажетдин Ялсығолов әҫәрҙәренән өҙөктәр, Мәүлә Ҡолой, Утыҙ Имәни, Салауат Юлаев шиғырҙары индерелгән. Антология Өфө Фән һәм технологиялар университетының башҡорт әҙәбиәте, фольклоры һәм мәҙәниәте кафедраһы уҡытыусы-ғалимдары профессор М.Х. Иҙелбаев, филология фәндәре кандидаты З.Ғ. Мырҙағолова тарафынан төҙөлгән. Мирас Хәмзә улы билдәләүенсә, кафедра ғалимдары тарафынан төрлө дәреслектәр күп яҙылһа ла, антология үҙ эсенә алған дәүерҙе сағылдырған китап ҡына оҙағыраҡ яҙылған. "Бөтөн студенттарҙың да боронғо төрки телендә һаҡланып ҡалған текстарҙы уҡырға мөмкинлеге юҡ. Шуға ла беҙҙең уларҙы башҡорт теленә тәржемә итеү теләге күптән бар ине. Башҡорттарҙың тамырҙары менән V быуаттың мәҙәни-әҙәби традицияларына барып тоташҡан бай әҙәбиәте бөтәһенә лә таныш булырға тейеш. Ә ҡомартҡыларҙы үҙ телеңдә уҡыу бигерәк тә әһәмиәтле", - ти Мирас Иҙелбаев.

"Киске Өфө" гәзите, №3, 2023 йыл

КИРЕ СЫҒЫРҒА