Башҡортостан Милли музейы филиалы булған Әхмәтзәки Вәлиди музейында билдәле яҡташыбыҙ, дәүләт эшмәкәре, Башҡортостан дәүләтселегенә нигеҙ һалыусыларҙың береһе, бөтә донъяға билдәле ғалим-көнсығыш белгесенең йәшәү һәм эшләүен күрһәткән бай коллекция тупланған. Шундай әйберҙәрҙең береһе Әхмәтзәки Вәлидиҙең 1960 йылдарҙа Төркиәнең Стамбул университетында уҡытҡанда кейеп йөрөгән академик мантияһы. Уны музейға 1995 йылда Өфөгә "Икенсе Вәлиди уҡыуҙары" на килгән ҡыҙы Иҫәнбикә Туған бүләк иткән.
Мантия 125*125 сантимер үлсәмле, ҡара төҫтәге йөн туҡыманан Төркиәлә тегелгән. Эске яҡтан йәшел төҫтәге ебәк туҡымалар ҡуйылған. Мантия өҫтөнән ҡара ебәк таҫма һалынған, һул яҡтан төймә өсөн элмәһе бар. Аҫта бер яҡтан алтын биҙәктәре бар. Мантия музейҙа МАЗВ ОФ 139 иҫәп һаны аҫтында һаҡлана. Шулай уҡ уның тураһында мәғлүмәт Рәсәйҙең Музей фонды Дәүләт каталогында ла баҫылған.

"Киске Өфө" гәзите, №24, 2023 йыл

КИРЕ СЫҒЫРҒА