Президент Владимир Путин мөрәжәғәтнамә менән сығыш яһаны. Унда ул уҙған ял көндәрендәге ваҡиғаларға аңлатма бирҙе.

Дәүләт башлығы фетнә күтәрергә йәки конституцион тәртипте боҙорға маташыу уңышһыҙлыҡҡа тарыуын һыҙыҡ өҫтөнә алды. "Вагнер" шәхси хәрби компанияһы баш күтәреүселәренең был ҡылығын ул енәйәт тип атаны. Шул уҡ ваҡытта ул башта барлыҡҡа килгән хәүефте нейтралләштереү, граждандарҙың конституцион тәртибен, ғүмерен һәм хәүефһеҙлеген һаҡлау өсөн мөмкин булғандың барыһы ла эшләнеүен билдәләне.
"Фетнәне ойоштороусылар үҙ иленә, халҡына, шулай уҡ енәйәткә ылыҡтырылыусыларға ла хыянат итте. Ялған һөйләп, уларҙы үлемгә этәрҙеләр. Рәсәй дошмандары, йәғни Киевтағы нео-нацистар, уларҙың көнбайыштағы ҡурсалаусылары, төрлө милли хыянатсылар Рәсәй һалдаттарының бер-береһен, хәрбиҙәрҙе һәм тыныс халыҡты үлтереүен, ахыр сиктә, беҙҙең илдең еңелеүен, йәмғиәтебеҙ тарҡалыуын теләй. Фронттағы һәм контрһөжүм барышындағы уңышһыҙлыҡтары өсөн реванш алырға хыялландылар, әммә барып сыҡманы", - тине Президент.
Дәүләт башлығы хәрбиҙәргә, хоҡуҡ һаҡлау органдары хеҙмәткәрҙәренә һәм махсус хеҙмәттәргә рәхмәт белдерҙе, "Һәләк булған летчиктарҙың фиҙаҡәрлеге Рәсәйҙе фажиғәле эҙемтәләрҙән ҡотҡарҙы" тип һыҙыҡ өҫтөнә алды. Шул уҡ ваҡытта "Вагнер" төркөмө яугирҙарының һәм командирҙарының күпселеген Донбасс һәм Новороссияны азат иткәндә яу яланында батырлыҡтарын иҫбатлаған, үҙ халҡына һәм дәүләтенә тоғро Рәсәй патриоттары ла тәшкил итә, тип билдәләне. Тап шуның өсөн дә фетнәлә ҡатнашҡандар аңына килһен өсөн барлыҡ саралар күрелде. "Барлыҡ килешеүҙәр үҙ көсөндә ҡала, - тине Президент. - Дөрөҫ ҡарар ҡабул иткән һәм "экстремаль һыҙатта туҡтаған" "Вагнер" шәхси хәрби компанияһы яугирҙары Оборона министрлығы менән килешеү төҙөп, хеҙмәтен дауам итә, яҡындары янына ҡайта йәки Беларусь Республикаһына бара ала".
"Ҡабатлайым, һайлау һәр берегеҙҙән тора, әммә фажиғәле хатаһын аңлаған Рәсәй һалдаттарын һайлау булыр тип ышанам. Беларусь Президенты Александр Лукашенкоға тыныс хәл итеүгә индергән тырышлығы һәм өлөшө өсөн рәхмәтлемен. Әммә ҡабатлайым, тап граждандарҙың патриотик мөнәсәбәте һәм бөтә Рәсәй йәмғиәтенең нығыныуы бөгөнгө көндә хәл иткес роль уйнаны. Был ярҙам Ватаныбыҙ өсөн иң ауыр һынауҙарҙы бергәләп еңеп сығырға мөмкинлек бирҙе. Бының өсөн һеҙгә рәхмәт", - тип йомғаҡ яһаны дәүләт башлығы.

Ләйсән ЗАКИРОВА.
"Киске Өфө" гәзите, №25, 2023 йыл

КИРЕ СЫҒЫРҒА