Уф, тағы яҙам инде. Бынау һабантуйҙарҙы әйтәм, нимә тип уны шоу-концертҡа әйләндереп бөтөрөргә инде...

Асылда, һабантуйҙың боронғо йөкмәткеһе һабан эштәре бөткәс, халыҡтың яланға сығып байрам итеүе ул. Алдынғыларҙы билдәләү, төрлө уйындар үткәреү, ырыу-ырыу халыҡтың үҙ-ара йырлап-бейеп күңел асыуын да күҙаллай әле ул. Бөгөн нисек? Шоу-бизнеста танылыу яулаған берәй артисты саҡыралар ҙа, үҙҙәренең мәҙәниәт хеҙмәткәрҙәрен ҡаҙан төбөнә ҡуялар. Милли кейемдә, арып-талып, шунда килгән түрә-ҡараны, "бөйөк" артистарҙы һыйлап торорға! Ул саҡырылған артистары шоу-бизнеста ни тиклем "текә", шул тиклем ҡиммәт. Ә район ни тиклем ҡиммәтерәкте саҡыра, шул тиклем текә! Татарстандан килтергәндәре былтыр уҡ 500 мең дә, 700 мең ине, быйылғыһын белмәйем. Белһәгеҙ, яҙырһығыҙ. Ә ул артистың һабантуйға хәжәте бармы? Уны күрергә теләгән кеше концертына барып та ҡарай ала. Халыҡты йәлеп итер өсөн шоу-ажиотаж кәрәкме? Әтеү һабантуйына кеше килмәҫме? Килмәүе лә ихтимал, сөнки күҙ буяу өсөн эшләнгән байрамдар халыҡты биҙҙереп бөттө. Шул системаны дөрөҫ итеп яйға һалып булмаймы икән ни ул!
Ә ул артисҡа түләгән аҡсаны ҡайҙан алалар? Әлбиттә, район хакимиәтенән. Ошо суммаға районға кәрәкле әйбер һатып алып, хеҙмәткәрҙәрҙең эшен ҡеүәтләп ебәрһәләр, эшләгән кеше өсөн дә, ябай халыҡ өсөн дә файҙа булыр ине. Машина хаҡына торошло бит. Әйтәйек, бер машина алып, алдынғы хужалыҡҡа бүләк иткәндә, башҡаларҙы дәртләндереү булыр ине. Хатта шул уҡ район мәҙәниәте мохтажлығына тотоноп, ҡеүәтлерәк аппаратура алғанда ла районда, ауылда эшләүсе мәҙәниәт хеҙмәткәрҙәре үҙҙәре үк ялан яңғыратып йырлай алыр ине. Артистарҙан һис кәм булмаған таланттар күп бит ауылдарҙа. Уларҙы сығарырға кәрәк һабантуй сәхнәләренә! Һабантуйҙарҙа йырлау (бейеү) борон-борондан иң ҙур дәрәжә, юғары күрһәткес һаналған.
Ләкин үҙебеҙҙең мәҙәниәт хеҙмәткәрҙәре сүплек таҙарта, урам һеперә, һабантуй етһә, ҡаҙан төбөн һаҡлай. Шулай булғас, абруйлы мәҙәниәт хеҙмәтенә ниндәй дәрт, ынтылыш булһын! Ғөмүмән, ауыл эшсәндәрен баһалар һабантуй байрамында ауыл халҡы һапһыҙ ҡара балта кеүек. Мәҙәниәт хеҙмәткәре лә, уҡытыусыһы ла, һабансыһы ла, һауынсыһы ла... Ҡуй инде!

Светлана НАСЫРОВА.
"Киске Өфө" гәзите, №31, 2023 йыл

КИРЕ СЫҒЫРҒА