"Башҡорт теле: яңы ҡараш 2.0" тип аталған дәреслек донъя күрҙе. Ул өлкәндәргә телде өйрәнергә ярҙам итәсәк, шул иҫәптән өҫтәмә материал булараҡ мәктәптә лә ҡулланыла аласаҡ. Проект сиктәрендә дәреслектең мобиль ҡушымтаһы эшләнгән, шулай уҡ нығытма материал өсөн 10 видеодәрес төшөрөлгән.

Проект "Донъя халыҡтары" ойошмаһы тарафынан Башҡортостан Башлығы Гранты ярҙамында тормошҡа ашырылған. Гранттың суммаһы - 3 млн һум. Проект етәксеһе урынбаҫары Фәнзилә Ғәзизова әйтеүенсә, дәреслектең тиражы 1500 экземпляр, уның бер өлөшө БР Мәғариф һәм фән министрлығына, Бөтөн донъя башҡорттары ҡоролтайына тапшырылған, үҙ сиратында, улар уны халыҡҡа таратасаҡ. "Башҡорт теле: яңы ҡараш 2.0" дәреслеге авторҙары Рида Латыпова менән Ләлә Сафина билдәләүенсә, ул балаларҙан бигерәк, уларға башҡорт телен өйрәнергә ярҙам итергә теләгән ата-әсәләргә тәғәйенләнгән. 10 өлөштән торған дәреслектең методик нигеҙен билдәле башҡорт, шулай уҡ сит ил авторҙары хеҙмәттәре тәшкил итә. Ләлә Сафина 21-се лицей уҡытыусыһы, ул ошо дәреслек ярҙамында башҡорт телен 100 сәғәттә өйрәнә аласаҡһығыҙ, тип ышандыра. "Мәктәптә бөтөн уҡыусылар ҙа башҡорт телен өйрәнә. Әммә ата-әсәләр үҙҙәре телде белмәүҙәре арҡаһында уларға ярҙам күрһәтә алмай. Төрлө китаптар, дәреслектәр күп ул, тик улар башлыса телде яҡшы белеүселәргә тәғәйенләнгән, сөнки уларҙың авторҙары - ғалимдар. Ә был дәреслектә ябай һөйләмдәр ҡулланыла, улар телмәр үҫтереүгә йүнәлтелгән", - ти Ләлә Сафина.
"Донъя халыҡтары" ойошмаһы етәксеһе Фәнзил Әҙелбаев проекттың мобиль ҡушымтаһын да эшләтеп күрһәтте. Ул Android, Apple платформаларына ҡуйыла, шулай уҡ компьютерҙарға ла ҡуйып буласаҡ. Уның ярҙамында һәр кем үҙенең белем кимәлен тикшерәсәк.

"Киске Өфө" гәзите, №33, 2023 йыл

КИРЕ СЫҒЫРҒА