Ошо көндәрҙә М. Ғафури исемендәге Башҡорт академия драма театры йылдағыса үҙенең сираттағы ижад миҙгелен матур саралар менән асып ебәрҙе.

Театрҙың 104-се ижад миҙгеле Заһиҙә Мусинаның "Килен" повесы буйынса Фирғәт Ғарипов ҡуйған драма менән асылды. Спектакль буйынса эш тураһында һөйләп, ҡуйыусы режиссер проза әҫәре менән тәүгә эшләүен, уны сәхнәгә яраҡлаштырыу өсөн яҙыусы Зөһрә Бураҡаеваға мөрәжәғәт итеүҙәрен әйтте. "Йәмғиәтебеҙҙә бындай теманы асыҡтан-асыҡ ҡуҙғатыу, был турала һөйләү ғәҙәте нисектер юҡ. Һәр ҡатын-ҡыҙҙың күңелендә кисерештәр уята ул. Спектаклде эшләгәндә лә быны тойҙоҡ", - тине Фирғәт Ғарипов. Әҫәрҙең авторы Заһиҙә Мусина ла яҙғандарының әсәһе яҙмышын сағылдырыуын йәшермәй. "Килен" спектаклендә төп ролде Лилиә Ғәлина башҡара.
Театр тамашасыларын был миҙгелдә шулай уҡ Таңсулпан Ғарипованың "Бөйрәкәй" роман-эпопеяһы буйынса ҡуйылған спектакль дә көтә. Уны театрҙың баш режиссеры Айрат Абушахманов сәхнәгә сығара. Спектакль ике өлөштән торор, тип күҙаллай ижади төркөм. Тәүгеһен Яңы йыл байрамына тиклем өлгөртөргә иҫәпләйҙәр. Бынан тыш, кескәй тамашасылар өсөн Евгений Шварцтың "Юғалған ваҡыт тураһында әкиәт"е әҙерләнә. "Быйыл тәүге тапҡыр спектаклдәрҙе йәйгеһен үк - 23 августа күрһәтә башланыҡ. Был бик уңышлы килеп сыҡты, тамаша залдары тулы булды. Сентябрҙә "Театр көҙө" милли театрҙар фестивалендә Саранск ҡалаһында булдыҡ. Ҡабарҙы-Балҡар республикаһының Нальчик ҡалаһына гастролдәргә сыҡтыҡ. Әйткәндәй, Эльбрусты яуланыҡ. Ә ноябрҙә Ҡаҙан ҡалаһына ҙур гастролдәр менән юлланабыҙ. Республика ауыл-ҡалалары буйлап та даими йөрөп торабыҙ һәм эш дауам итәсәк", - тине театр директоры Иршат Фәйзуллин.

ӘЙТКӘНДӘЙ...
Быйыл Х Халыҡ-ара театраль олимпиада Венгрияның Будапешт ҡалаһында уҙа һәм унда Рәсәйҙән М. Ғафури исемендәге Башҡорт академия драма театры ҡатнаша. Улар илдең 95 милли театр коллективы араһынан һайлау үткән һәм Олимпиадаға Олжас Жанайдаров пьесаһы буйынса Айрат Абушахманов ҡуйған "Джут" спектаклен алып бара. Был спектаклде Венгрияла күрһәтеүҙе ҡабул итеүсе яҡ үҙе үтенгән.

Камила ҒӘЛИЕВА.
"Киске Өфө" гәзите, №39, 2023 йыл

КИРЕ СЫҒЫРҒА