Өфөнән KurAI (Ҡурай) программистар командаһы Up Great Милли технологик башланғыстарҙың "Ашығыс эҙләү" конкурсында еңеү яуланы һәм 100 млн һум аҡсалата бүләк алды. Йәштәр юғалған кешеләрҙе тиҙ арала эҙләп табыу системаһын уйлап сығарған һәм эшләгән. Командала - Башҡортостан вуздарын тамамлаған Сәлим Байгилдин, Илназ Фәтҡуллин һәм Тимур Иҙрисов.

"ЛизаАлерт" эҙләү-ҡотҡарыу отрядына юғалған кешеләрҙе эҙләшеү буйынса йыл һайын 40 мең ғариза килә һәм "Ашығыс эҙләү" конкурсы был эштә ярҙам итеү маҡсатында ойошторола. Ярыш өс этаптан торған. Унда Рәсәйҙең 45 төбәгенән барлығы 267 команда ҡатнашҡан, шуларҙың 12-һе финалға үткән. KurAI командаһы технологик ҡатмарлыҡтарҙы 27 минутта тулыһынса үтеп сыға алған. "Үҙебеҙҙең нейросеть ярҙамында урман һыҙатында йәшеренгән 18 кешенең 16-һын табып (был 89 процент), технологик ҡаршылыҡтарҙы үтә алған берҙән-бер команда булыуыбыҙға ҡарамаҫтан, өлгәшелгәндәрҙә туҡтап ҡалмаҫҡа һәм һөҙөмтәлелекте йөҙ процентҡа тиклем күтәрергә ниәтләйбеҙ", - ти KurAI командаһының капитаны Сәлим Байгилдин.
Һынауҙарҙы үткәндән һуң еңеүсе команда ағзалары "ЛизаАлерт" эҙләү-ҡотҡарыу ирекле отряды сафтарына баҫҡан һәм юғалған кешеләрҙе эҙләү эшенә йәлеп ителгәндәр. Йәштәр ирекмәндәр һәм эҙләү хеҙмәттәре хеҙмәткәрҙәренә конкурс сиктәрендә уйлап табылған техник сиселеште артабан ҡулланыуы уңайлы булһын өсөн графикалы интерфейс булдырған.
Әйткәндәй, егеттәрҙең икәүһе - Илназ Фәтҡуллин һәм Тимур Иҙрисов Рәми Ғарипов исемендәге 1-се Башҡорт республика гимназия-интернатында, Сәлим Байгилдин Республика башҡорт лицей интернатында уҡыған.

"Киске Өфө" гәзите, №50, 2023 йыл

КИРЕ СЫҒЫРҒА