Владимир Путин "Рәсәй Федерацияһында мәғариф тураһында" Федераль законға үҙгәрештәр индереү тураһында" Федераль законға ҡул ҡуйҙы. Уға ярашлы, башланғыс һәм төп дөйөм белем биреү программалары дәүләт аккредитацияһы булған мәғариф ойошмаларының төп дөйөм белем биреү программаһына "Хеҙмәт" (технология) дәресе индерелә.

Федераль законда уҡыусыларҙың бөтә талаптарҙы мотлаҡ үтәүе, уларҙы яуаплы хеҙмәткәрҙәр контролендә тотоу ҡарала. Уҡыусылар талаптарҙы үтәмәгән осраҡта дисциплинар яуаплылыҡҡа тарттырылыуы мөмкин.
Федераль ҡанун шулай уҡ педагогтарға һәм белем биреү ойошмаһының башҡа хеҙмәткәрҙәренә ҡарата физик һәм психик көс ҡулланыуҙы тыя. Бынан тыш, педагогик хеҙмәткәрҙәрҙең хоҡуғын һәм законлы мәнфәғәтен яҡлау ысулдары билдәләнә, хеҙмәт хоҡуҡтары, социаль гарантиялар, социаль ярҙам саралары аныҡлана.
Уҡыусыларға смартфон һәм башҡа гаджеттарҙы файҙаланыуға сикләүҙәр индерелә, әммә мәктәп ҡорамалдарын файҙаланыу тыйылмаясаҡ. Законға ярашлы, уҡыусы йәки уҡытыусы ғүмеренә һәм һаулығына хәүеф янаған осраҡта һәм башҡа ғәҙәттән тыш хәл-ваҡиға булмағанда, дәрес ваҡытында телефон ҡулланырға ярамай.
Ата-әсәләр дәрестә мобиль телефон ҡулланыуҙы тыйыу тураһында күптән һорай ине. Яңы закон дисциплинаны яҡшыртасаҡ, сөнки балалар смартфон менән булышып ултырмаясаҡ, тине Дәүләт Думаһы рәйесе Вячеслав Володин. Уның әйтеүенсә, ҡабул ителгән ҡарар белем сифатын һәм уҡытыусының абруйын күтәрәсәк, үҫмерҙәрҙең үҙ-ара йәнле аралашыуына булышлыҡ итәсәк.

"Киске Өфө" гәзите, №1, 2024 йыл

КИРЕ СЫҒЫРҒА