Республика менән идара итеү үҙәгендә Башҡортостан Башлығы Радий Хәбиров Өфө ҡалаһының 450 йыллыҡ юбилейына әҙерлек барышы буйынса сираттағы кәңәшмә уҙғарҙы.

Һөйләшеүҙең төп темаһы - алда торған ҙур байрамды бай йөкмәткеле итеү. Өфө хакимиәте башлығы Ратмир Мәүлиев республика министрлыҡтары һәм ведомстволары менән бергә байрамдың календарь планы төҙөлөп, унда мәҙәни, спорт, мәғрифәти-ағартыу, конгресс форматындағы саралар, йәштәр проекттары индерелеүе хаҡында әйтеп уҙҙы. Билдәләнеүенсә, барлығы 100-ҙән ашыу сара ҡаралған, шул иҫәптән федераль кимәлдәгеләре лә. Ҡырҡлап үҙенә күрә уникаль күренеш булған саралар Өфөлә тәүгә уҙғарыласаҡ, ә традицион фестивалдәр һәм форумдар күләмлерәк форматта ойоштороласаҡ. Мәҫәлән, 1 июндә "Ватан" этнопаркында VK Fest тип аталған ҙур сәнғәт байрамында Рәсәйҙең әйҙәүсе башҡарыусылары сығыш яһап, Красноярск, Сочи, Санкт-Петербург һәм Мәскәүҙә уҙғарыласаҡ шундай уҡ фестивалдәр серияһын асып ебәрәсәк.
Башҡортостандың мәҙәниәт министры Әминә Шафиҡова, 2024 йылда Өфө ҙур мәҙәни фестивалдәр һәм проекттар майҙансығына әүереләсәк, тип белдерҙе. Улар иҫәбендә - халыҡ-ара "Туғанлыҡ" театр фестивале, "Өфөлә Шаляпин кисәләре" тип нарыҡланған Халыҡ-ара опера сәнғәте фестивале, "Китап-байрам" Халыҡ-ара китап йәрминкәһе, "Денис Мацуев тәҡдим итә" фестивале, "Көҙ романтикаһы" классик музыка фестивале, "Евразия йөрәге" фестивале, "Геройҙар заманы" Бөтөн Рәсәй патриотик йыр конкурсы, "Әйҙә, уйнарға" Бөтөн Рәсәй уйындар фестивале һәм башҡа күп саралар. Унан башҡа йәй айҙарында Башҡортостандың баш ҡалаһында Ҙур театр, Александра театры, Сергей Образцов исемендәге Үҙәк ҡурсаҡ театры гастролдәре уҙғарыласаҡ, шулай уҡ Третьяков галереяһы һәм Дәүләт Эрмитажы күргәҙмәләре ойоштороласаҡ.
Өфөнөң 450 йыллығының төп байрам көнө 2024 йылдың 31 авгусына тәғәйенләнгән. Өфө халҡы һәм ҡунаҡтар өсөн концерт-күңел асыу программалары бер юлы өс майҙансыҡта - "Ватан" этнопаркында, Ленин исемендәге һәм Машина төҙөүселәр майҙандарында күрһәтеләсәк. Юбилей йылының иң ҙур ваҡиғаларынан "Рәсәй - спорт державаһы" Халыҡ-ара спорт форумын, "Рәсәй һәм Ҡаҙағстан араһында төбәк-ара хеҙмәттәшлек" тигән юбилей форумын атарға була. Һуңғыһы егерменсе тапҡыр уҙғарыла.
Башҡортостан Башлығы апрель аҙағына тиклем ваҡиғалар картаһын - барса юбилей сараларының ентекле графигын әҙерләргә ҡушты. Иң элгәре мәҙәни, спорт, конгресс форматындағы һәм гастрономик сараларға иғтибар ителәсәк. Ул туристарҙы һәм ҡунаҡтарҙы байрам сараларына йәлеп итеү өсөн мәғлүмәти эште көсәйтергә ҡушты.
Кәңәшмәлә эре юбилей объекттарын төҙөү барышы ҡаралды. 2024 йылдың көҙөнә Октябрь районында Көрәш һарайын сафҡа индереү күҙаллана. Унда төҙөлөш эштәре график буйынса бара. Был майҙансыҡта ХII Халыҡ-ара "Рәсәй - спорт державаһы" форумы уҙғарыласаҡ. Инорс микрорайонында ишеү слаломы комплексының беренсе сиратын төҙөү тамамланып килә. Йәй айҙарында комплекстың тирә-яғы төҙөкләндереләсәк. 2024 йылдың көҙөнә спорт ҡоролмаһы ярыштар уҙғарыуға әҙер булырға тейеш.

"Киске Өфө" гәзите, №16, 2024 йыл

КИРЕ СЫҒЫРҒА