24-26 майҙа баш ҡалабыҙ Өфөлә "Китап-байрам" гөрләп уҙҙы. Былтырғы сарала көндәр эҫе торҙо, шуға күрә лә өс көн буйына Шайморатов һәйкәле ҡаршыһындағы фонтанда балаларҙың сыр-сыу килеп һыуҙа ҡойоноуы иң иҫтә ҡалған зауыҡлы тамаша булды.

Быйыл иһә тәбиғәт иркәләтмәне, хатта һуңғы көндә ямғыр яуып ҡуйҙы. Шуға күрәлерме, байрамға килеүселәр палаткалар, тирмәләр, биналар эстәренә һырыҡты, тематик сараларҙа күберәк ҡатнашты, тап шуның өсөн дә быйылғы "Китап-байрам" интеллектуаль тәрәнлеге менән дә былтырғыһынан айырылып торҙо. Күрәһең, тәбиғәт ғали йәнәптәре һуңғы йылдарҙа күп кенә сараларҙың шоуға әүерелеп барыуын иҫкәртеп, тап ошо көндәрҙә ер өҫтөнә һалҡын һауа, ямғыр ебәргәндер, тим. Был уңайҙан тағы бер фекер: тажзәхмәт сире таралып, күп кенә кешеләр фатирҙарында бикләнгәндә, бер билдәле шәхесебеҙ электән йыйылып килгән күп һанлы китаптарын уҡып сығыуы хаҡында һөйләгәйне. Икенсенән, һуңғы йылдарҙа "Кешеләр хәҙер гәзит-журнал, китап уҡымай, бар диҡҡәте интернетта", тигән фекер нығынып өлгөргәйне. "Китап-байрам" был фекерҙе лә инҡар итте, йәғни тап ошо өс көндә кешеләр ябырылып китеп китап һатып алды. Зәйнәб Биишева исемендәге Башҡортостан "Китап" нәшриәте китаптарының ғына быйыл ике меңдән ашыу данала һатылыуы шул турала һөйләй, былтыр иһә уларҙың баҫмалары аҙыраҡ һатылған булған.
"Китап-байрам" алдағы йылдарҙа ла тағы ҡыҙыҡлыраҡ, зауыҡлыраҡ итеп үткәрелер тип ышанғы килә. Башҡортостан баш ҡалаһы ысын мәғәнәһендә Китап баш ҡалаһына әйләнһен, тип теләйек!

Әхмәр ҒҮМӘР-ҮТӘБАЙ.
"Киске Өфө" гәзите, №21, 2024 йыл

КИРЕ СЫҒЫРҒА