Ташкентта Башҡортостан Башлығы Радий Хәбиров Үзбәкстандың премьер-министры Абдулла Арипов менән осрашты. Яҡтар артабан берлектәге эш йүнәлештәрен тикшерҙе.

Радий Хәбиров үҙенең телеграм-каналында ике яҡлы тауар әйләнешенең тарихта иң яҡшыларҙың береһе булыуын билдәләне. Үзбәкстан Башҡортостандың тышҡы сауҙа әйләнешендә бишенсе урынды биләй. "Шул уҡ ваҡытта үҫеш өсөн ҙур мөмкинлек бар икәнен күрәбеҙ, - тип өҫтәне Башҡортостан Башлығы. - Сауҙа мөнәсәбәттәрен үҫтереү менән бер рәттән, сәнәғәт кооперацияһын формалаштырырға ынтылабыҙ. Ташкент өлкәһендә берлектәге технопарк асырға йыйынабыҙ. Уны ойоштороу форматтарының береһе - Үзбәкстан биләмәһендә үҙебеҙҙең "Алға" махсус иҡтисади зонаһы филиалын асыу. Бизнес эшенә лә булышлыҡ итәсәкбеҙ. Үзбәк эшҡыуарҙары Благовещенда автомобиль транспорты өсөн газ баллондары етештерә башларға ниәтләй. Газ-мотор яғыулығы баҙарының үҫеүенә бәйле был продукцияға ихтыяж ҙур. Беҙ республика делегацияһы составына Үзбәкстан баҙарына сығырға әҙер булған компания етәкселәрен дә индерҙек".
Радий Хәбиров һүҙҙәренсә, уҙған ике йылдағы әүҙем эш Үзбәкстан менән мөнәсәбәттәрҙең яңы этабын үҫтереү өсөн яҡшы база әҙерләне. Ташкентҡа сәфәр йомғаҡтары буйынса республика үҙ-ара мөнәсәбәттәрҙе нығытыу буйынса яңы килешеүҙәргә өлгәшә алыр, тип ышана Башҡортостан Башлығы.

"Киске Өфө" гәзите, №21, 2024 йыл

КИРЕ СЫҒЫРҒА