Республикала Салауат Юлаевтың 270 йыллығы билдәләнгән көндә, 16 июндә, милли батырыбыҙҙың тыуған яғында - Салауат районының Тәкәй ауылы урынында "Салауат ере" тарихи-мәҙәни комплексы асылды. Тантанала Башҡортостан Башлығы Радий Хәбиров ҡатнашты.

Проект Мостай Кәримдең "Салауат. Өн аралаш ете төш" әҫәренә нигеҙләнеп әҙерләнгән. Парктың дөйөм майҙаны - 4,5 гектар, төҙөлөштөң хаҡы - 128,5 миллион һум. Был архитектураһы, күләме һәм дизайны буйынса үҙенсәлекле булған тарихи парк. Концепцияны әҙерләгәндә урындағы тәбиғәтте һаҡлап ҡалыу мотлаҡ шарт булып торған. Республиканың Туризм министрлығы хәбәр итеүенсә, йыл һайын ошо гүзәл тәбиғәт мөйөшөнә 17 меңдән ашыу турист килә. Был парк асылғас, уларҙың һаны бер нисә тапҡырға артыр тип көтөлә.
"Кешеләрҙе ниндәйҙер тарихи ваҡиғалар һәм, әлбиттә, тәбиғәт үҙенә йәлеп итә. Ә бында икеһе лә бар. Был ерҙә элек Салауат Юлаевтың тыуып үҫкән һәм бала саҡ, үҫмер йылдары үткән ауыл булған. Салауат Юлаевтың Башҡортостан өсөн ни тиклем мөһим икәнен барыһы ла белә. Ул яугир ғына түгел, ижади кеше лә булған. Уның шиғырҙары тәрән мәғәнәле һәм аҡыллы. Икенсенән, бындағы күркәм тәбиғәт тә үҙенә ылыҡтыра туристарҙы. Бында йылға буйлап ағырға мөмкин", - тине Радий Хәбиров "Башинформ" мәғлүмәт агентлығы журналисының һорауына яуап биреп.
Республика етәксеһе Радий Хәбиров геопарктарҙы үҫтереү буйынса киң мәғлүмәт кампанияһын ойошторорға, "Салауат ере" комплексын "Башҡортостанда оҙон ғүмерлелек" программаһына индерергә ҡушты.

"Киске Өфө" гәзите, №24, 2024 йыл

КИРЕ СЫҒЫРҒА