Өфөнөң Совет майҙанында 12-15 сентябрҙә "Әйҙә уйнарға!" Бөтә Рәсәй уйындар фестивале үтәсәк. Икенсе тапҡыр ойошторолған сарала балалар өсөн тауарҙар етештереүселәр бөтә илдән килә, төрлө күргәҙмәләр, интерактив майҙансыҡтар, оҫталыҡ дәрестәре үтә, балалар яратып ҡараған йәнһүрәт геройҙары уйынсыҡтар иленә ишектәрҙе асасаҡ.

"Былтыр балаларыбыҙға - тормошобоҙҙағы иң мөһим кешеләргә Совет майҙанын дүрт көнгә биргәйнек. Байрам килеп сыҡты тип уйлайым. Балаларға уйынсыҡтарҙың төрлөлөгөн күрһәтергә теләгәйнек. Әлбиттә, балаларыбыҙҙың яҡшылыҡҡа өйрәткән һәм тәрбиәләгән иң шәп уйынсыҡтары булһын өсөн барыһын да эшләйбеҙ. Оло ләззәт менән һеҙҙе икенсе "Әйҙә, уйнарға!" Бөтә Рәсәй фестиваленә саҡырам", - тине Башҡортостан Башлығы Радий Хәбиров.
Беренсе фестивалдә илдең төрлө төбәктәренән килгән 140-тан ашыу балалар өсөн тауарҙар етештереүселәр ҡатнашты. "Алтын айыу" балалар тауарҙары милли премияһы игротекаһына 30-ҙан ашыу алдынғы компания 500-гә яҡын уйын һәм уйынсыҡ тәҡдим итте. Уны 4 меңдән ашыу өлкәндәр һәм балалар килеп ҡараны. Бала саҡ байрамында барлығы 250 өфөлө һәм ҡунаҡтар ҡатнашты. Беренсе фестивалдең ойоштороу кимәлен Рәсәй мәғариф министры Сергей Кравцов та юғары баһаланы һәм уның әһәмиәтен билдәләп, сараға федераль статус бирергә тәҡдим итте.
Быйыл фестивалдә ҡатнашыусыларҙы һәм ҡунаҡтарҙы бай эшлекле программа көтә. "Заман бала сағының уйын мәҙәниәте" Халыҡ-ара фәнни-ғәмәли конференцияһы иң төп сараларҙың береһе буласаҡ. "Әйҙә, уйнарға!" Бөтә Рәсәй фестивале БР Башлығы Радий Хәбиров башланғысы менән уҙғарыла. Ул Балалар тауарҙары индустрияһы предприятиелары ассоциацияһы һәм Башҡортостан Хөкүмәте, РФ Федерация Советы, РФ Сәнәғәт һәм сауҙа министрлығы ярҙамында ойошторола.

"Киске Өфө" гәзите, №26, 2024 йыл

КИРЕ СЫҒЫРҒА