Ҡарбуздың дауалау сифаттары ифрат күп. Был татлы емеш бөйөр, йөрәк-ҡан тамыр ауырыуҙарынан, диатездан һәм диабеттан ярҙам итә. Ҡарбуз бөйөрҙәрҙең антитоксик функцияһын тиҙ яҡшырта, шуға күрә ул һары ауырыуы менән ауырыусыларға бик файҙалы. Склероз, подагра, артрит, ревматизм, һимереү менән яфаланғанда ҡарбузды мөмкин тиклем йышыраҡ ҡулланырға кәңәш ителә. Ҡарбуз ҡабығы йыуан эсәк эшмәкәрлеген әүҙемләштерә, балаларҙа һәм өлкәндәрҙә дисбактериозды дауалай.

Йыуан эсәк шешеүе. Киптерелгән ҡарбуз ҡабыҡтарын иҙергә, 2 стакан ҡайнар һыуға 5 ҡалаҡ иҙмә һалырға, ҡапҡас менән ябып, һыуынғансы төнәтергә. Һарҡытырға. Көнөнә 4 тапҡыр 0,5 стакан ҡабул итергә.

Гельминтоз. Духовкала ҡарбуз емештәрен киптерергә, ит турағыстан үткәрергә, һөт менән бутарға. Көн дауамында ҡабул итергә.

Мигрень, баш ауырыуы. Әҙ-әҙ йотомлап, ҡабаланмай, 2 стакан ҡарбуз һутын эсергә. Ә маңлайға ҡалын ҡарбуз ҡабығын бәйләргә. Ауыртыу тиҙ үтә.

Диатез. 0,5 литр һыуға 2 ҡалаҡ иҙелгән ҡарбуз ҡабығын алырға, талғын утта 5 минут ҡайнатырға, 2-3 сәғәт төнәтергә, һарҡытырға, көнөнә 3 тапҡыр ашарҙан ярты сәғәт алда 0,5 стакан эсергә.

Йөрәктең ишемия ауырыуы. Ҡарбуз һутына 2 алма һуты өҫтәргә. Ошо ҡатышманы көҙ миҙгелендә көн һайын ҡабул итергә.

Күп ауырыуҙарҙан дауа булып торһа ла ҡарбуздың кире яҡтары тураһында ла оноторға ярамай. Ҡарбуз менән ағыуланыу осраҡтары күп. Әгәр ҡарбуз йомшағында бер нисә һарғайған урын булһа, уны һис кенә лә ҡулланырға ярамай. Был емеште эс ауырыуҙары булғанда ҡулланыу тыйыла. Тағы ла атеросклероз сирлеләргә ҡарбуз ҡайнатмаһын ҡулланырға ярамай.

Рим ӘХМӘДОВ.
"Киске Өфө" гәзите, №30, 2024 йыл

КИРЕ СЫҒЫРҒА