Башҡортостан Үҙәк һайлау комиссияһы етәксеһе Азат Ғәлимханов "Сәләм" программаһында 6 сентябрҙән 8 сентябргә тиклем үтәсәк республика Башлығын һайлау кампанияһы хаҡында һөйләне.

Уның әйтеүенсә, Мәскәүҙә өҫтәмә һайлау участкаһы асыу планлаштырыла. Рәсәйҙең баш ҡалаһында йәшәүселәр РФ Президенты ҡарамағындағы Тулы хоҡуҡлы вәкиллеге базаһында тауыш бирә аласаҡ. Шулай уҡ теркәлеү урынында булмаған кешеләр "мобиль һайлаусы" механизмына инә аласаҡ.
Кандидаттар исемлегендә: Радий Хәбиров ("Берҙәм Рәсәй"ҙән), Иван Сухарев (ЛДПР), Владимир Нагорный ("Ғәҙел Рәсәй"), Артур Шәйнуров (КПРФ) һәм Илшат Тимерйәнов ("Яңы кешеләр"). Спикер билдәләүенсә, берҙәм тауыш биреү көнөндә Өфөнөң 54-се бер мандатлы округы буйынса Башҡортостан Дәүләт Йыйылышы - Ҡоролтайға депутат һайлау, шулай уҡ урындағы үҙидара органдарына 200-ҙән ашыу һайлау кампанияһы үтәсәк. "2 сентябргә тиклем - территориаль һайлау пункттарында йә күп функциялы үҙәктәрҙә, 28 августан 2 сентябргә тиклем - участка һайлау пункттарында һәм Мәскәү ваҡыты буйынса 3 сентябргә төн уртаһына тиклем "Дәүләт хеҙмәттәре" порталы ярҙамында уңайлы һайлау пунктын һайлай алаһығыҙ. Урындағы үҙидара органдарына - ауыл һәм ҡала Советтарына, муниципаль район һәм ҡала округтары Советтарына һайлауҙарҙа "мобиль һайлаусы" механизмы ҡулланылмай. Башҡортостан Үҙәк һайлау комиссияһының ҡыҙыу элемтәһе: 8 800 347 54 54. Үҙәк һайлау комиссияһының рәсми сайты: bashkortostan.izbirkom.ru", - тип аңлатма бирҙе Азат Ғәлимханов.

"Киске Өфө" гәзите, №31, 2024 йыл

КИРЕ СЫҒЫРҒА