Өфө ҡәлғәһенең 450 йыллығына арналған байрам саралары 30-31 августа үтәсәк. Баш ҡала округы хакимиәтенән хәбәр итеүҙәренсә, барлыҡ саралар патриотик тәрбиәгә һәм тарихи дөрөҫлөктө һүрәтләүгә йүнәлтелгән.

- 30 августа көндөҙгө сәғәт 3-тән "Арт-Квадрат"та "АйДа Фест" урам театрҙары фестивале асыла. Өс көн дауамында барасаҡ фестиваль сиктәрендә баш ҡаланың ете районында 40-тан ашыу тамаша күрһәтеләсәк. Ленин районындағы "Арт-Квадрат" ҡала үҙәге фестиваль үткәрелгән төп майҙан буласаҡ. Ә 31 августа сәғәт көндөҙгө 12-лә карнавал тантаналы йөрөшө ойошторола: ул В.И. Ленин исемендәге майҙандан башланасаҡ. Был фестивалдә Санкт-Петербург, Севастополь, Пермь, Мәскәү, Ҡаҙан, Йошкар-Ола, Әлмәт, Силәбе һәм Өфө ҡалаларынан урам театрҙары ҡатнаша. Сараның хедлайнеры - "Микос" Мәскәү театры 1 сентябрҙә кискеһен сығыш яһай.

- Шулай уҡ 30 августа Рус драма театры бинаһы эргәһендәге сәхнәлә киске концерт сәғәт 6-ла башлана, был көндә "Өфө яңғырай!" Бөтә Рәсәй фестивале сиктәрендә тынлы уйын ҡоралдары оркестрҙары патриотик әҫәрҙәр менән сығыш яһай.

- Бынан тыш, ошо уҡ 30 август көнөндә киске сәғәт 7-лә "Торатау" конгресс-холлының амфитеатрында "Евразия йөрәге" фестивале асыла. Тәүге көндә урындағы артистар, Pizza һәм "Харизма" (Беларусь) төркөмдәре, Ваня Дмитриенко һәм Алексей Воробьев сығыш яһаясаҡ. 31 августа тамашасыларҙы Элвин Грей, Zainetdin этно-проекты, йырсы Алһыу, HammAli & Navai көтә. Фестиваль Башҡортостандың халыҡ артисы Николай Басков сығышы менән тамамланасаҡ.

- 31 августа көндөҙгө сәғәт 12-лә "Өфө - хеҙмәт ҡаһарманлығы ҡалаһы" стелаһы эргәһендә киләсәк быуындарға "Ваҡыт капсулаһы"н һалып ҡалдырыу тантанаһы уҙасаҡ.

- Ошо уҡ ваҡытта Рус драма театры ҡаршыһындағы майҙанда "Өфө мәң-гелек" ҡала фестивале башлана: бында ҡаланың һәр районынан сығыштар көтөлә. Ә кискеһен "Өфөнө данлап" тип аталған концертты махсус конкурс ярҙамында һайлап алынған йыр менән асалар. Был йырҙы "Мираҫ" ансамбле хоры һәм Ҡала мәҙәниәт һарайының "Притяжение" йыр театры солистары башҡара. Өфөгә дан йырлаған ҙур концертта Милли гвардия оркестры һәм йырсылары, Екатерина Гусева, Дмитрий Харатьян һәм Олег Газманов ҡатнашасаҡ.

- Райондарҙағы саралар "Дим", "Беренсе май" һәм "Тулҡын" парктарында көндөҙгө сәғәт 12-нән киске 5-кә тиклем ойошторола. Әйткәндәй, "Моторҙар эшләүсе" мәҙәниәт һарайы алдындағы майҙанда билдәле Рәсәй йырсыһы Полина Гагарина сығыш яһаясаҡ. Йырсы үҙенең гонорарының бер өлөшөн Махсус хәрби операцияла ҡатнашыусыларға ярҙамға йүнәлтергә теләк белдерҙе, уның был башланғысын күп кенә ҡатнашыусылар күтәрмәләне.

- Әйткәндәй, юбилей сараларына бәйле автотранспорт хәрәкәтенә сикләүҙәр индереләсәк. Сикләүҙәр осоронда йәмәғәт транспорты маршруттары ла үҙгәрәсәк. Шулай уҡ сиктәш ихаталарҙан сығыу юлдары ла ябылыуы ихтимал.

"Киске Өфө" гәзите, №34, 2024 йыл

КИРЕ СЫҒЫРҒА