Республикала оло йәштәгеләргә иҫәпләнгән яңы мутлашыу ысулы барлыҡҡа килгән: мутлашыусылар үҙен торлаҡ-коммуналь хеҙмәттәр менән бәйле компания хеҙмәткәрҙәре тип таныштыра!

Өфө ҡалаһы буйынса 6-сы полиция бүлегенә 75 йәшлек пенсионер ғариза менән мөрәжәғәт итте. Ул билдәһеҙ номерҙан шылтыратыуҙарын, шылтыратыусы үҙен энергия һатыу компанияһы хеҙмәткәре тип таныштырыуын, уның республикалағы барлыҡ оло йәштәгеләр өсөн иҫәпләү күрһәткестәрен тапшырыу уңайлы булһын өсөн ҡушымта әҙерләнеүен белдереүен хәбәр итә. Бының өсөн ойошмаға шәхси мөрәжәғәт итеү талап ителмәй, программаға мәғлүмәт индереү генә етеүен әйтә һәм үҙенең ярҙамын тәҡдим итә. Һөҙөмтәлә мутлашыусы пенсионерҙы мобиль ҡоролмала экранды күрһәтеү функцияһын тоташтырырға күндерә.
Артабан ул смс-кодтар ярҙамында пенсионерҙың мобиль банкы ҡушымтаһына инә. Оло йәштәге ирҙең иҫәбенән үҙенә 500 мең һум аҡса күсерә һәм бәйләнеш өҙөлә. Аҡса енәйәтселәрҙең кеҫәһендә булғандан һуң, һөйләшеү туҡтатыла. Зыян күреүсе бер ниндәй ҙә яңы ҡушымта ҡуйылмағанын, картанан аҡса урланғанын күреп, полицияға мөрәжәғәт иткән.
Ошондай уҡ ғариза менән Өфөнән 72 йәшлек пенсионер ҡатын мөрәжәғәт итте. Зыян күреүсегә шулай уҡ ялған хеҙмәткәрҙәр шылтыратып, иҫәпләү ҡоролмаларын алмаштырырға һәм ҡушымта ҡуйырға тәҡдим итә. Һуңынан экранды күрһәтеү функцияһын тоташтырырға күндереп, үҙ иҫәптәренә 900 мең һум аҡса күсерә.
Әлеге ваҡытта мутлашыу факттары буйынса Рәсәй Федерацияһы Енәйәт Кодексының 158-се статьяһы буйынса енәйәт эштәре ҡуҙғатылған. Башҡортостан Республикаһы буйынса Эске эштәр министрлығы иҫкәртә:
"Хөрмәтле граждандар! Шылтыратыусыларға ышанмағыҙ. Ойошма хеҙмәткәрҙәре мессенджерҙағы клиенттар менән бәйләнешкә инмәй. Таныш булмаған кешеләргә экранды күрһәтеү функцияһы аша мобиль ҡоролмағыҙға инеү мөмкинлеген бирмәгеҙ - был мутлашыусыларҙың эше! Һаҡ булығыҙ! Оло йәштәге туғандарығыҙҙы һәм таныштарығыҙҙы был мутлыҡ схемаһы тураһында иҫкәртегеҙ!"

Башҡортостан Республикаһы
Эске эштәр министрлығының матбуғат хеҙмәте.
"Киске Өфө" гәзите, №36, 2024 йыл

КИРЕ СЫҒЫРҒА