"Башҡорт дәүләт ҡурсаҡ театры яңыртылған, заманса һәм уңайлы бинала 93-сө ижад миҙгелен асырға әҙерләнә", - тип яҙа республика етәксеһе Радий Хәбиров үҙенең телеграм-каналында.

"2023 йылдың декабренән алып бында 462 спектакль сәхнәләштерелде, уларҙы 81 149 тамашасы ҡараны, - тине ул. - Декабрҙе иҫкә алам, сөнки тап шул ваҡытта артистар "Мәҙәниәт" милли проекты буйынса күләмле реконструкциянан һуң тәүге спектаклен ҡуйҙы".
Билдәле булыуынса, яңы миҙгелдә премьералар, республика буйлап гастролдәр, фестивалдәрҙә ҡатнашыу ҡаралған. 26-29 сентябрҙә Өфөлә Сергей Образцов исемендәге дәүләт академия ҡурсаҡ театрын гастролдәргә көтәләр. Уның артистары Башҡорт дәүләт ҡурсаҡ театрында алтын фондтан бер нисә спекталь күрһәтә.
"Ҡыҙыҡ, ҡурсаҡ сәхнәһе оҫталары беҙҙең театрҙы нисек баһалар икән?" - тип өҫтәне Башҡортостан Башлығы Радий Хәбиров. Уның билдәләүенсә, Башҡорт ҡурсаҡ театрында тормош - сәхнәлә генә түгел. Бында балалар студияһы ла эшләй. Режиссерҙар, актёрҙар һәм рәссамдар балалар менән бергә һүрәт төшөрә, ҡурсаҡтар яһай, декорациялар уйлап сығара һәм спектаклдәр сәхнәләштерә.
"Октябрь айында театрҙа мультимедиалы уйын залын асырға уйлайбыҙ. Компьютер технологиялары ярҙамында балалар һәм уларҙың ата-әсәләре башҡорт мәҙәниәте һәм ғөрөф-ғәҙәттәре, риүәйәттәре менән таныша алыр", - тип йомғаҡ яһаны республика етәксеһе.

"Киске Өфө" гәзите, №38, 2024 йыл

КИРЕ СЫҒЫРҒА