Өфөбөҙ 17 октябрҙән 19-ына тиклем Рәсәйҙең спорт баш ҡалаһына әүерелә, йәғни беҙҙә "Рәсәй - спорт державаһы" халыҡ-ара спорт форумы үтә.

Был оло форум сиктәрендә Башҡортостандың баш ҡалаһына илдең һәм донъяның бөтә мөйөштәренән 150-нән ашыу олимпия чемпиондары һәм тренерҙары ҡатнашлығында бер нисә сара үтә. Уларҙа төрлө илдәрҙән биш меңдән ашыу спорт һәм эшлекле берләшмә вәкилдәре ҡатнашасаҡ, улар араһында Фәләстан, Камерун, Намибия, Сербия, Бахрейн, Ираҡ, Ҡаҙағстан һәм башҡа илдәр вәкилдәре бар. Форум өс көн дауам итә һәм 19 октябрҙә "Йәйәү йөрөү көнө" менән тамамлана, унда республиканан 25 мең самаһы кеше һәм баш ҡала ҡунаҡтары ҡатнашыуы көтөлә.
Форумдың девизы - "Спорт. Ғаилә. Рәсәй" - ҡыҫҡа ғына, шул уҡ ваҡытта илебеҙ граждандарының спортты, ғаилә ҡиммәттәрен баһалауын, илебеҙ өсөн ғорурланыу тойғоларын да сағылдыра. "Традиция буйынса, форум һәр ваҡыт илебеҙҙең төрлө ҡалаларында үтә. Был юлы оло спортты ошо көндәрҙә үҙенең 450 йыллығын байрам иткән Башҡортостан баш ҡалаһы - Өфө ҡабул итте. Форум ҡунаҡтары Рәсәйҙең тағы бер үҙенсәлекле, бик ҡыҙыҡлы һәм күп төрлө төбәгенең мәҙәниәте, тарихы һәм мираҫы менән танышасаҡ", - тип белдергәйне Рәсәй Президенты Владимир Путин былтыр ошо форумдың Өфөлә үтәсәге тураһында иғлан иткәндә.
"Рәсәй - спорт державаһы" - беҙҙең республика ҡабул иткән иң оло ваҡиға. Форум традиция буйынса Рәсәй Президенты ҡатнашлығында үтә. Беҙ форум сиктәрендә Өфөбөҙҙә Фехтование үҙәге һәм Ишеү слаломы комплексын асасаҡбыҙ. Бынан тыш, Бокс төнө, керлинг, фехтование, көрәш буйынса ярыштар ингән киң спорт программаһы әҙерләнек", - тине Башҡортостан Башлығы Радий Хәбиров.
Шулай итеп, Өфөнөң 8 майҙанында 40-лап сара үтәсәк. Спорт ярыштары, мәҙәни программалар, эшлекле сессиялар, Рәсәй Федерацияһы Президенты ҡарамағындағы Физик культура һәм спортты үҫтереү буйынса совет ултырышы, күргәҙмәләр - улар иҫәбендә.

"Киске Өфө" гәзите, №41, 2024 йыл

КИРЕ СЫҒЫРҒА