Мәләүез районы Корнеевка ауылында күренекле яҙыусы, йәмәғәт эшмәкәре Булат Рафиҡовтың тыуыуына 90 йыл тулыуға арналған "Хәтер булып әйләнеп ҡайтам..." тип исемләнгән кисә үтте.

Булат Рафиҡовтың баҡыйлыҡҡа күсеүенә 26 йыл үтһә лә, рухы йыл һайын тыуған Дәүләтҡол ауылына, уның талантын, ижадын хөрмәт иткән яҡташтары янына ҡайта һәм уларҙы берләштереүен дауам итә. Был юлы ла сарала ҡатнашыусылар әҙиптең ватансылыҡ һәм тормошҡа һөйөү өлгөһө менән һуғарылған ижадының сикһеҙ тәрән донъяһына сумды, хәтирәләре менән уртаҡлашты.
Мәләүез районы хакимиәте халыҡ таланттарын үҫтереү, ижад иткәндәрҙе дәртләндереү маҡсатында 1999 йылда Булат Рафиҡов исемендәге премия булдырҙы. Ул ике йылға бер тапҡыр тапшырыла. Быға тиклем ошо исемгә 22 талантлы әҙәбиәт, мәҙәниәт һәм сәнғәт эшмәкәре лайыҡ булды. Быйыл Булат Рафиҡов исемендәге премияға Рәсәйҙең һәм Башҡортостандың Журналистар союзы ағзаһы, ҡала һәм райондың почетлы гражданы Юнир Аҙнағолов, биҙәү-ҡулланма ижады оҫтаһы Фәнисә Бикбаева, педагогия хеҙмәте ветераны Гөлнур Семенова, кәсепсе Ғәйнулла Рахманғолов лайыҡ булды. Юрматы ырыуы ҡор башы Риф Иҫәнов ҡулынан ауыл биләмәһенең әүҙем кешеләре Маҡтау грамоталары алды.

Гөлиә ШАҺИҒӘЛИНА.
"Киске Өфө" гәзите, №43, 2024 йыл

КИРЕ СЫҒЫРҒА