Башҡортостан Башлығы Радий Хәбировтың указына ярашлы, 12-14 декабрҙә Өфөлә Бөтөн донъя башҡорттары ҡоролтайының VI съезы үткәрелә. Форумда республиканан, Рәсәй төбәктәренән һәм сит илдәрҙән 500-ҙән ашыу делегаттың ҡатнашыуы көтөлә.

18 апрелдән 20 июнгә тиклем республикала делегаттар һайлау һәм съезд эшендә ҡатнашыу өсөн рәсми делегациялар ойоштороу буйынса дөйөм йыйылыштар (ҡоролтайҙар) уҙҙы. Бөтөн донъя башҡорттары ҡоролтайының съезына әҙерлек барышында республика райондарында һәм ҡалаларында 318 делегат һайланды. Рәсәйҙең 34 төбәгенән 171 делегат билдәләнгән. Сит ил делегациялары Бөтөн донъя башҡорттары ҡоролтайы менән берлектә эшләгән йәмәғәт ойошмалары әүҙемселәренән тора: съезға 12 илдән 38 ватандашыбыҙҙың килеүе көтөлә.
- Сара барышында "Торатау" конгресс-холында форумдар, түңәрәк ҡорҙар, секция һәм пленар ултырыштар үткәреү ҡаралған, - тип белдерҙеләр Бөтөн донъя башҡорттары ҡоролтайының матбуғат хеҙмәтендә. - Маҡсат - милләт-ара тыныслыҡты һәм татыулыҡты нығытыу, башҡорт халҡының рухи мәҙәниәтен һаҡлау һәм үҫтереү, төбәктән ситтә йәшәгән ватандаштарыбыҙға булышлыҡ итеү.
Белеүегеҙсә, Бөтөн донъя башҡорттары ҡоролтайы (конгресы) йәмәғәт ойошмаһы 1995 йылда съезд ҡарары буйынса ойошторолдо. Биш йылға бер тапҡыр саҡырылған съезд (ҡоролтай) Бөтөн донъя башҡорттары ҡоролтайының юғары органы булып тора. 1995-2019 йылдарҙа биш съезд уҙғарылды.
Бөгөн Ҡоролтай республика райондарында һәм ҡалаларында 70 бүлексәне берләштерә; Рәсәйҙең 36 субъектында башҡорт йәмәғәт ойошмалары эшләй. Шулай уҡ сит илдәрҙә йәшәгән һәм Бөтөн донъя башҡорттары ҡоролтайы менән хеҙмәттәшлек иткән ватандаштарыбыҙ ҙа байтаҡ. Уларҙың барыһы ла башҡорт халҡының мәҙәниәтен, телен һәм традицияларын һаҡлау, донъя киңлегендә республикабыҙҙың имиджын нығытыу буйынса әүҙем эшләй.
Ҡыҫҡаһы, шағир Әхмәр Ғүмәр-Үтәбай әйтмешләй: "Атайсалға ағылалар Бөтөн донъя башҡорттары…"

Ләйлә АРАЛБАЕВА.
"Киске Өфө" гәзите, №47, 2024 йыл

КИРЕ СЫҒЫРҒА