Башҡортостан спортсыһы Зарина Исламова Таиландта тай боксы буйынса халыҡ-ара титул яуланы. Был хаҡта Сибай ҡалаһы хакимиәтенән хәбәр иттеләр.

23 йәшлек Зарина Исламова 54 килограмға тиклемге ауырлыҡ категорияһында Таиланд спортсыһы Дангконгфа Банчамекты ышаныслы еңде.
"Ярыштар легендар Раджадемнерн стадионында үтте. Был Таиландтың тай боксы (муай-тай) ҡағиҙәләре буйынса алыштар ойошторолған стадиондарҙың береһе, Раджадемнерн стадионы чемпионы титулы был спорт төрөндә абруйлы булып һанала. Зарина - Сибайҙың "Ҡара аждаһа" клубы тәрбиәләнеүсеһе, Александр Гаврилов етәкселегендә шөғөлләнә", - тип билдәләнеләр Сибай хакимиәтендә.
Хәтерегеҙгә төшөрәбеҙ, 2023 йылда Зарина Исламова муай-тай буйынса Рәсәй чемпионы исемен яуланы, ә 2024 йылда Грецияла тай боксы буйынса донъя чемпионатында еңеүсе булды.

ӘЙТКӘНДӘЙ...
Башҡортостан спортсыларының төрлө кимәлдәге ярыш-бәйгеләрҙә еңеү яулауы тураһында хәбәрҙәр килеп тора.

• Мәҫәлән, Башҡортостан иҫәбендә - Рәсәй-Ҡытай йәштәре Ҡышҡы уйындарының өсөнсө миҙалы. Илдең йыйылма командаһы фристайл буйынса көмөш призер булды. Команда составында Башҡортостандың тау саңғыһы мәктәбе тәрбиәләнеүсеһе Оскар Әйүпов та сығыш яһаны. Был хаҡта үҙенең телеграм-каналында спорт министры Руслан Хәбибов хәбәр итте. "Бөтә команданы, беҙҙең Оскарҙы, уның тренерҙары Елена һәм Роберт Муллағәлиевтарҙы ҡотлайым!", - тип билдәләне ул. Бынан алдараҡ Оскар Әйүпов "акробатика" дисциплинаһында фристайл буйынса бронза призер булды.

• Ҡаяға үрмәләүсе Өфө ҡыҙҙары Бөтә Рәсәй ярыштарында миҙалдар яуланы, тип хәбәр итә Башҡортостан Спорт министрлығының телеграм-каналы. "Рокландс" спорт клубынан Мария Заверуха 10-13 йәшлек ҡыҙҙар араһында көмөш призер булды. Ә "Спартак" олимпия резервындағы спорт мәктәбенән Елизавета Поройкова 16-17 йәшлек ҡыҙҙар араһында 3-сө урынды алды. Ҡаяға үрмәләү буйынса "Раштыуа турниры" Воронеж ҡалаһында үтте.

• Башҡортостандың еңел атлеттары Волга буйы федераль округы беренселегендә 9 миҙал яуланы. Ярыштар Киров ҡалаһында уҙҙы, унда 14 округтан 600-гә яҡын спортсы ҡатнашты, тип хәбәр иттеләр республиканың Спорт министрлығынан. Бейеклеккә һикереүҙә Динар Ғилимшин һәм Александр Самойлов иң яҡшы һөҙөмтәләр күрһәтте, Азамат Хәлитов һәм Нелли Ғилмуллина "бронза" алды. 3000 метр араға йүгереүҙә Ева Вдовина (18 йәшкә тиклем) һәм Елизавета Косолапова (16 йәшкә тиклем) финишҡа икенсе булып килде. Елизавета Косолапова 1500 метрға йүгереүҙә бронза миҙал яуланы. Бынан тыш, Арсений Кутышев (етебәйге) һәм Эрик Унжанов (800 метрға йүгереү) бронза миҙалдарға лайыҡ булды.

"Киске Өфө" гәзите, №2, 17 – 23 ғинуар 2025 йыл

КИРЕ СЫҒЫРҒА