Бөгөн Рәсәйҙә меңәрләгән ғаилә Махсус хәрби операциянан ирҙәренең, улдарының, ағаларының, аталарының ҡайтыуын көтә. Был көтөү уларҙың көндәрен борсолоу һәм өмөт менән тултыра, ә оҙайлы айырылышыуҙар ғәҙәти йәшәү рәүешен үҙгәртә.
Балалары менән ҡалған һалдат ҡатындары - ғаиләләре өсөн ысын терәк. Хәрби хәрәкәттәрҙә ҡатнашмаһалар ҙа, уларҙың көрәше лә әһәмиәтле. Был ҡатын-ҡыҙҙар ирҙәренә ярҙам йыя, бер-береһен хәстәрләй һәм балаларын тәрбиәләй. Улар ирҙәренә хаттар яҙа, кисерештәрен уртаҡлаша һәм уларҙың хоҡуҡтары өсөн көрәшә, иң ауыр ваҡытта ла ғаилә беренсе урында ҡалыуын иҫкәртә.

БР Дәүләт Йыйылышы депутаты Эльвира Мацкевич һөйләй:
- Булмышы буйынса ҡатын-ҡыҙҙың бер нисә роле бар. Ҡатын-ҡыҙ-ҡатын, ҡатын-ҡыҙ-әсәй, ҡатын-ҡыҙ-эшсе, бәлки, ҡатын-ҡыҙ-етәксе, офис хеҙмәткәре, ниндәйҙер производствола эшләүсе. Әммә минең тормошомда тағы бер роль бар. Бына 13 йыл мин - тормош иптәшемде полигондан, күнекмәләрҙән, хәрби командировкаларҙан шылтыратыуҙар, хәбәрҙәр көткән, беҙҙең ерҙә тыныслыҡ булыр тип көткән ҡатын-ҡыҙ. Махсус хәрби операция осоронда был көтөү көсәйҙе генә. Был көтөүҙәр егерме йәшендә йәш матур лейтенантҡа кейәүгә сыҡҡан йәш ҡыҙҙан сыҙамлыҡ, аҡыл, ире өсөн ысын ҡәлғә булырға өйрәнгән ҡатын-ҡыҙҙы тәрбиәләне. Беҙҙең егеттәр Махсус хәрби операцияла илебеҙ бөтөнлөгөн һаҡлай һәм бөйөк Рәсәйебеҙҙең бөйөклөгөн арттыра. Тап ошо өмөт мине, Ватан яугирҙары ғаиләләре комитеты төҙөп, уның тирәләй ҡатын-ҡыҙҙарҙы берләштерергә лә өйрәтте. Был - яҡын кешеләрен көткәндәрҙең ҙур берләшмәһе. Был көтөү миңә түҙергә, берләштерергә, алғы һыҙыҡтағы иремдең ҡатыны булырға ярҙам итте. Был көтөү миңә тағы ысын мөхәббәттең нимә икәнен күрһәтте. Мөхәббәт - ул ғашиҡ булыу ғына түгел. Ул - мөнәсәбәттәрҙең икенсе кимәле, ул саҡта һин яратҡан кешең өсөн барыһын да эшләйһең. Һин кешеләргә ғүмереңдә бер ҡасан да булмағанса ярҙам итәһең.

Әлфиә ӘҺЛИУЛЛИНА.
"Киске Өфө" гәзите, №9, 7 - 13 март 2025 йыл

КИРЕ СЫҒЫРҒА