Өфөлә "Ҡурай даны" милли телепремияһының еңеүселәре билдәләнде!

4-се тапҡыр уҙғарылған "Ҡурай даны" милли телепремияһының Финалы гөрләп-шаулап Башҡортостан дәүләт концерт залында үтте.
Хеҙмәт кешеһен, үҙ һөнәренең оҫталарын данлай, дәртләндерә торған был проект билдәле журналист Рита Өмөтбаева етәкләгән "Ҡурай" телеканалының күркәм һәм әһәмиәтле сараларының береһе. Быйыл премия алты номинацияла тапшырылды. Еңеүселәргә "Ҡурай даны" көмөш миҙалы тапшырылды, ә зал заман геройҙарын алҡыштарға күмде. "Ҡул оҫтаһы" номинацияһында ир-егеттәрҙән - Ҡариҙел районынан Ришат Ғәлинуров, ҡатын-ҡыҙҙарҙан - Иглин районынан Ғәбиҙә Вәлиева; "Ер кешеһе" номинацияһында - Бөрйән районынан Айнур Бейембәтов;
"Иң шәп ауыл хакимиәте башлығы" номинацияһында -Ғафури районынан Әхнәф Нуғайғолов; "Миһырбанлы ғаилә" номинацияһында - Ҡариҙел районынан Мәҙинә һәм Эдик Ғәлимйәновтар; "Тамашасы һөйөүе" номинацияһында - Ишембай районынан Дания Ямалетдинова бүләкләнде.
Тормоштоң биҙәге ябай кешеләр булыуын күрһәткән премия үҙ эшенең оҫтаһы булған ер кешеләренә, ҡул оҫталарына, ауыл хакимиәте башлыҡтарына, ауыл фельдшерына, миһырбанлы ғаиләләргә бирелде. Мәҫәлән, "Ҡурай даны" милли телевизион премияһының көмөш миҙалына лайыҡ булған Иглин районы оҫтаһы Ғәбиҙә Вәлиева үҙе тыуып үҫкән Ҡурған яҡтары башҡорттарына хас кейемде, биҙәктәрҙе тергеҙеү менән мәшғүл. "Башҡортостан Республикаһының сигелгән картаһы" проектын тормошҡа ашырыуҙа ла әүҙем ҡатнашҡан ул. Өйөндә музей булдырған. Ә 24 йыл ауыл биләмәһе башлығы булып эшләүсе Ғафури районы Имәндәш ауылынан Әхнәф Нуғайғолов әйтеүенсә, "Яратҡан эш ялҡытмай, дәрт, илһам бирә. Халҡым, тыуған ерем мәнфәғәтенә эшләйем, йәшәү шарттары көйлө булһын өсөн тырышам".
Ауылдар тыуған ере өсөн янып йәшәгән тырыш һәм дәртле замандаштарыбыҙ менән көслө. Бындай кешеләр айырым иғтибарға һәм хөрмәткә лайыҡ. Рита Өмөтбаева етәкләгән проект бына шундай заман геройҙарын таныта ла инде.

"Киске Өфө" гәзите, №13, 4 - 10 апрель 2025 йыл

КИРЕ СЫҒЫРҒА