Һуғыш осоро балаһы ағайым Усманов Тимерғәзим Әһелулла улы 1940 йылдың 20 апрелендә Әлшәй районының Баязит ауылында тыуа. Тәпәй баҫҡан сағында һуғыш башлана. Колхоз рәйесе булып эшләгән атаһы һуғышҡа китә, ҡаты яралана һәм 1943 йылда, таяҡҡа таянып, тыуған яғына әйләнеп ҡайта.

Атаһының ҡайтып инеүен улы Тимерғәзим шулай хәтерләй: "Атайымдың нисек ҡайтып ингәнен хәтерләмәйем. Уның ҡарауы, алған яраларынан һыҙланыуҙары иҫемдә. Уның әрнеүҙәрен еңеләйтер өсөн беҙ ҙә теште ҡыҫа инек. Еңеү көнөндә кешеләрҙең урам буйлап нисек шатланып йөрөүҙәрен мәңге оноторлоҡ түгел. Беҙ барабан һуғып йөрөнөк. Һуғыштан ҡайтыусы һәр һалдатты ауыл осона сығып ҡаршыланыҡ. Яңы ҡайтыусыны күрмәй ҡалмаҫ өсөн ауыл осонда дежурҙа торҙоҡ. Үҙемде биш йәшемдән алып хеҙмәт кешеһе, колхозсы итеп иҫәпләйем. Киренән колхозды етәкләгән атайымдың күсере булып йөрөнөм. Атайымды көтөп, тырантаста йомолоп рәхәтләнеп йоҡлағаным әле лә хәтерҙә..."
Хеҙмәт биографияһын күсер булып башлаған Тимерғәзим Әһелулла улы атаһы кеүек үк тыуған яғына тоғро ҡала, ауыл хужалығы институтын тамамлай, инженер-механик һөнәрен үҙләштерә, дөрөҫөрәге, атты "ҡорос айғырға" алыштыра. Ун ике йыл "Союз" колхозын етәкләй, күрше райондағы "Миәкә" совхозында директор урынбаҫары булып эшләй. 1987 йылда уны Миңлеғәле Ғөбәйҙуллин исемендәге колхозға рәйес итеп һайлайҙар. Артабанғы хеҙмәт юлы уның Ҡырмыҫҡалы районы менән тығыҙ бәйле.
Хаҡлы ялға сыҡҡас, Ҡырмыҫҡалы районы үҙәгендә мәсет һалып, унда имам-хатиб вазифаһын башҡара, меңле ырыуы башҡорттары ойошмаһының дини эштәр буйынса комиссияһын етәкләй.
Ғүмеренең һәр миҙгелендә лә атаһының күсере булараҡ ҡулына алған тормош дилбегәһен һәр ваҡыт ҡулында тота белә хеҙмәт кешеһе. Һәр хәлдә, хеҙмәт тәрбиәһе алғандар һис ҡасан да юғалып ҡалмайҙыр.

Нәфис АҠҠОЛОВ.
"Киске Өфө" гәзите, №19, 16 - 22 май 2025 йыл

КИРЕ СЫҒЫРҒА